Upland municipalities ti Ilocos Sur, mapagbalin a wi-fi zone

SUYO, Ilocos Sur – No agballigi ti  maipadpadas a proyekto ti gobierno probinsial a panamagbalin a wi-fi zone dagiti munisipio iti dumaya a paset ti probinsia, maaddaanton iti access iti internet dagiti taga-Ilocos Sur nga agnaed kadagiti sangapulo ket uppat nga upland municipalities ket matungpalton ti kalkalikagumanda a pannakaikonektarda iti lubong.

Segun ken ni Gov. Luis “Chavit” Singson, no  agballigi ti proyekto, nadardaraston ti komunikasion dagiti amin nga LGU iti gobierno probinsial babaen ti internet a saanen a kasapulan pay ti idadanonda iti kapitolio no adda dagiti saludsoden ken surotenda a resolusion ken kiddaw iti opisinana.

Malaksid iti dayta, mabalinto metten dagiti adda kapamiliana iti ballasiw-taaw a kasarita ken makainniliw dagiti kakabagianda babaen ti video chat, saan a kas ita nga agdepdependeda laeng iti selpon tapno makapatangda dagiti ipatpategda iti biag.

“Kayattayo a pagbalinen a mas epektibo ti komunikasion iti sibubukel a probinsia ken matulongantayo pay dagiti kakailiantayo tapno makapatangda dagiti kapamiliada sadiay abroad,” kinuna ti gobernador.

Sumaruno a phase ti posible a pannakaduplikar ti proyekto kadagiti barangay halls tapno uray kadagiti barbarangay nga adayo iti sentro ti ili ket maaddaanen iti access iti internet.

Kabayatanna, pinagyamanan ni Mayor Samuel Subagan ti panagbalin ti ilina a Suyo a pakaipadasan ti proyekto.

Kinunana a nupay saan pay a naiyestablisar a nasayaat ti proyekto ken adda pay laeng bumbuntog ti koneksion, dakkel a katulonganda daytoy ta makaipatuloddan iti mensahe iti gobierno probinsial ken dadduma nga ili a saanen a kasapulan pay nga agurayda iti sumagmamano nga aldaw no ipatulod dagitoy babaen ti koreo.

“Siinanamakami ditoy Suyo a napintas ti pagbanagan ti proyekto tapno maserbian uray dagiti barbarangay iti ilimi,” kinuna ti mayor.

Kinuna ni Subagan a naipakaammonan kadagiti padana a barangay captains iti sibubukel a probinsia ti kaadda daytoy maipadpadas a proyekto ket iyur-urayda metten ti pannakaidanon ti kaaspingna a proyekto kadagiti barbarangayda.

“Napintas daytoy a proyekto aglalo no librento a serbisio daytoy kadagiti balbalay ta addanton komunikasionda iti abroad  uray aniaman nga oras. Mausar pay daytoy iti panagsukisok dagiti agad-adal a saanen a kasapulan ti iyuulogda iti highway tapno laeng agresertsda,” innayon ni Subagan.

Maipalagip nga iti umuna a paset ti 2011, nakonektaran dagiti amin a barangay halls dagiti amin nga upland municipalities iti satellite TV tapno makita dagiti bumarangay dagiti mapaspasamak iti sangalubongan babaen ti telebision.#