Uppat natay, 8 nasugsugatan iti nagsasaruno nga aksidente a nakainbolbaran dagiti lugan

CAMP ELPIDIO QUIRINO, BULAG, Bantay, Ilocos Sur – Nagsasaruno dagiti aksidente a nakainbolbaran dagiti lugan ken nakatayan ti uppat ken nakasugatan ti 8 sumagma-mano nga aldaw kalpasan ti Paskua.

Iti aksidente ti lugan a napasamak iti Sinait, Ilocos Sur idi agarup 6:20 ti malem ti Disiembre 26, natay ni Diego Ibe y Agpaoa, 35, naasawaan, mannalon, ken residente iti Barangay Cabarambanan, Sinait, Ilocos Sur, idi naka-dungpar ti motorsiklona ti motorsiklo ni Roberto Somera y Sardeng, 40, naasawaan, ken residente iti Barangay Namruangan, Cabugao, Ilocos Sur.

Naammuan iti inbestigasion dagiti polis nga agpaabagatan ti Honda XRM a minaneho ni Ibe idinto nga agpaamianan met ti Isuzu Trooper a mina-neho ni  Somera ket idi addadan iti Barangay Macabiag, Sinait, mapapati nga inobertekan ni Somera ti maysa a di nabigbig a lugan ngem nakakaut iti bangir a linia a puon ti nag-dungparan dagiti dua a lugan.

Naikras ti lugan da Ibe a puon ti nakadunoranda ti inluganna a ni Jonathan Ibe y Agreda, 19, baro, 2nd year high school student ken residente iti Barangay Turod, Badoc, Ilocos Norte.

Naitaray dagiti dua iti Corpuz Clinic and Hospital ngem indeklara ti doktor a natayen ni Diego Ibe.

Boluntario ni Somera a sim-muko iti Sinait police station.

Napasamak met ti sabali nga aksidente ti lugan iti San Ildefonso, Ilocos Sur idi agarup alas 6:30 ti malem ti Disiembre 26 a nakainbolbaran ti maysa a motorsiklo ken traysikel.

Segun iti report, agpaamia-nan ti motorsiklo a minaneho ni Ropino Tabangcura y dela Cruz, 37, naasawaan, kalu-ganna ti asawana a ni Leticia, 40, ken ti anakda a ni Daisy, 7, agpapada a residente iti Sitio Pampamitmit, Barangay Camestisoan, Sto. Domingo, Ilocos Sur, idi mapapati a dinungpar ti traysikel a mina-neho ni Alvino Rubiniol y Aguilar, 44, naasawaan, ken residente iti Barangay San Pablo, Sto. Domingo, Ilocos Sur ti motorsikloda.

Nagsagrap dagiti agassawa ken ti anakda kadagiti sugat ket naitarayda iti Metro Vigan Cooperative Hospital, Bantay, Ilocos Sur ngem pimmusay ditoy ni Daisy kalpasan ti maysa nga oras.

Mapapati a nakainom ni Rubiniol idi mapasamak ti aksidente.

Kabayatanna, agpada a natay dagiti nagmaneho idinto a nasugatan dagiti back ridersda idi nagdinnungpar dagiti motorsikloda iti national highway a sakup ti Barangay, San Ramon, Magsingal idi agarup 10:45 ti rabii ti Disiembre 27.

Dead on arrival iti Magsingal District Hospital dagiti biktima a da Paulo Suitos y Urobio, 19, baro, ken Mark Anthony Carino y Tubon, 19, baro, ken agpada a residente iti Barangay San Clemente, Magsingal, Ilocos Sur. Naiyalis met iti Metro Vigan Cooperative Hospital da Criselda Ugalino y Arellano , 19, baro, residente iti Barangay San Clemente, ken Richard Go y Pangilinan, 2, baro, ken residente iti Ba-rangay San Ramon, Magsingal, gapu kadagiti sinagrapda a sugat.

Kas maibatay iti inbestiga-sion, mapapati a kimmaut iti bangir a linia ti Honda Wave a minaneho ni Suitos a nakagapu iti panagdinnungparda iti XRM a minaneho ni Carino.

Mapapati a kimmaut met iti bangir a linia ti Blinx MCX isu a nakidinnungpar iti Euro 150 motorcycle iti national high-way a sakup ti Barangay Guimod, Bantay, Ilocos Sur idi agarup 10:46 ti rabii ti Disiembre 28.

Saanen a naiyabut pay iti Metro Vigan Cooperative Hospital  ti biag ti drayber ti Blinx MCX a ni Jonathan Leiza y Bravo, 25, baro, ken residente iti Barangay IV, Vigan City. Iti met la MVCH ti nakaitarayan da  Darwin Rayray y Tabuac, 18, baro, ken residente iti Barangay Quimmarayan, Sto. Domingo, ken Mark Louie Tababa y Battad, 18, baro, agpada a residente ti Barangay Quimmarayan, Sto. Domingo, Ilocos Sur  idinto a naipan iti Gabriela Silang General Hospital ni Maydee Vallangca, y Tabuno, residente iti Casili, Sto. Domingo.

Segun iti report, agpa-amianan ti Euro 150 a minaneho ni Rayray ngem mapapati a kimmaut iti liniana ti Blinx MCX a minaneho ni Leiza, kaluganna ni Rodolfo Pil y Quintua, 25, ken residente iti Caoayan, Ilocos Sur isu a head on collision dagiti dua a lugan.

Nakaro ti dadael dagiti dua a lugan.#