Uppat nga aldaw a panagtrabaho iti makalawas, naiyussuat

SAN FERNANDO CITY, – Kas paset ti panagsalimetmet ti lokal a gobierno ditoy, nangrugi itay Abril 13 nga uppat laengen nga aldaw iti makalawas nga agtrabaho dagiti empleado ti gobierno ti siudad.

Babaen ti Executive Order No. 05-2015 nga inyisio ni Mayor Pablo Ortega, inadaptar ti gobierno ti siudad ti uppat nga aldaw iti makalawas a panagtrabaho iti city hall manipud iti Lunes agingga iti Huebes, 7:00 ti bigat aginggana iti 6:00 ti malem.

Kinuna ti maysa nga opisial a babaen daytoy naipabassit nga aldaw a panagtrabaho iti makalawas, makainut ti gobierno ti siudad iti koriente agsipud ta sa la maluktan dagiti aircon iti 8:00 iti bigat ken maiddep iti 4:00 iti malem.

Manamnama a babaen ti baro nga iskema, ad-adda nga agbalin a produktibo dagiti empleado ken pumigsa ti tukad ti pannakapnekda iti trabahoda, malaksid nga umat-atiddog ti aldaw a makadennada ti pamiliada.#