Uppat nga aldaw, tallo a rabii (Maikasiam a paset)

“Ngem no maabakka, agparintumengka iti sanguanak saka ipukkaw a salloyka!”

“Siut!” kinuna ni Randolf idinto a tinangadna manen dagiti pangal ti kongkreto nga agdan. Nabaelanna pay a tinaray nga inuli ti agdan a sumang-at iti Lourdes Grotto idiay Baguio, daytoy la ketdin?

“Agbilangak iti tallo,” kinuna ni Margret idinto a nagsagana. “Maysa… dua… tallo!”

Naggiddanda a timmaray a sumang-at. Iti apagbiit, linabsan ni Margret ni Randolf. Inseniasna a kamakamen ni Randolf.

Mangrugin nga aganangsab ni Randolf ngem dina maunaan ni Margret. Kayarigan daytoy ti kigaw a di agpaapros kadagiti agpanggep a mangtiliw kenkuana.

Asidegdan iti tapaw idi kellaat a nagarukong ni Margret. Nagsardeng ni Randolf iti abayna.

“Something wrong?” inamadna.

“I overestimated myself. Naibbusannak iti pigsa,” umanal-al nga insungbat ni Margret.

“Ha! Ha! Naabakka ngaruden,” kinuna ni Randolf ket pinanawanna ti balasang.

Idi makadanon iti tapaw, nagbannikes a nanguray ken Margret.

Madamdama, addaytan ti balasang, lumablabbasit ti pingpingna a dinayas ti agpababan nga init. Nagkulibagtong ti barukong ni Randolf. Manen, immapon ti naisalsalumina a rikna iti lansadna.

“Well, inabaknak. Kayatmon nga alaen ti gunggonam?” pinerreng ti balasang.

“Saan pay nga ita. Inton awan ti isturbo,” kinuna ni Randolf sana insungo ti tallo nga agtutubo a rimmuar iti kueba.

Nagkatawa ni Margret. “Iti umisu a tiempo ken lugar?” manutsutil ti timekna.

“Karbengak dayta kas nangabak,” kinuna ni Randolf.

“Your wish is my command, your Honor,” nagkurno pay ni Margret.

Kellaat, adda immapay ken ni Randolf. Inggagara kadi ni Margret ti nagpaabak?

Ngem naglumen ti panagduaduana idi ginuyod ni Margret tapno unorenda ti nailet a dalan a kumamang iti kueba.

Nagmattider ni Randolf iti sungaban ti kueba idinto nga impalawlawna ti panagkitana iti naitangkarang a buya iti sanguananna.

Kasla nabatombalani dagiti mata ni Randolf a nangtangad kadagiti stalactites a kasla dadakkel a gayang a naitugkel iti bubongan ti kueba.

Iti dayta a darikmat, panagriknana, adda iti sanguananna ti naindaklan a kanbas, obra maestra a partuat ti naindaklan a pintor.

“Wow! Splendid! Daytoyen ti kadaegan a buya a naimatangak,” kinuna ni Margret idinto a dimmenden iti baro. “Mamatiak a sinukog daytoy ti Mannakabalin nga Ima.”

“Ania pay la ti ur-urayenta? Let’s explore the caves,” kinuna ni Randolf.

Kinibin ni Randolf ti balasang. Idi damo, naannad ti pannagnada. Nabato iti uneg ken panipngeten. Ngem madamdama, nasanay ti mata ken dapanda ket pimmardas ti panagdaliasatda.

Kas naammuan ni Randolf, adu ti pannakasiled ti Callao Caves. Ngem pito laeng ti inrekomenda da Arthur a serkenda agsipud ta peligroso kano dagiti dadduma. No makakitakayo iti nalabaga, ballaag dayta a diyo serken ti chamber ta naderraas, inyunay-unay ni Arthur.

Natupar da Randolf ti nalayang a paset a silsilnagan ti lawag manipud iti bubongan ti kueba. Adda naaramid a bassit nga altar ditoy.

“Aginanata pay,” kinuna ni Margret sa immunan a nagpusot iti naipaurnos a kayo a pagtugawan. Inseniasna ti panagtugaw ni Randolf iti abayna.

Sumagmamano a turista ti agreretrato iti sanguanan ti altar.

“Adda nakabasaak nga iti Netherlands, kas kadagiti pagilian ti Europa, saan a mannakimisa dagiti agnaed,” kinuna ni Randolf.

“Agpayso,” insungbat ni Margret. “Iti aldaw ti Domingo, kalawakaw dagiti simbaan. Nalipatanen dagiti kalugaranmi nga ikkan iti tiempo nga agrukbab iti Dios. Awanen ti panawenda para iti pammati. Sabalin ti diosda – dagiti material a banag.”

“Pudno ta kunam,” nakuna ni Randolf. “Uray ditoy Kailokuan, umad-adun dagiti agikay iti simbaan. Ngem panagkitak, sabsabalika a Dutch. Dakkel pay laeng ti panamatim iti Dios!”

“Diak kadi nadakamat a dara ti Ilokana ti agtartaray iti uratko?” nakuna ni Margret. “Natawidko ti kinarelihioso ni Mamang ken ti kinaindependiente ni Papang.”

Pagammuan, narikna ni Randolf ti pannakaisadag ti ulo ni Margret iti abagana. Simmuknor iti agongna ti ayamuom ti buok ti balasang.

Madamdama, nariknana ti apros ti balasang iti pingpingna.

“Ammom kadi a nawaya ti sex iti Netherlands?” kinuna ni Margret idinto a piniritpiritna ti puon ti lapayag ni Randolf.

“Nabasbasakon dayta,” insungbat ni Randolf. “Kinapudnona, naammuak a maysa a paglatakan ti Amsterdam dagiti red light districts.”

“Ha?” nasdaaw ti balasang. “Kasano a naammuam dayta?”

“Naistoria dayta ti maysa a kamannuratanmi a napan nagpasiar iti Netherlands babaen ti awis ti kabsatna. Masarakan kano iti De Wallen, Singelgebied ken Ruysdaelkade dagiti sex shops, sex theatres, peep shows, ken sex museums ken dagiti coffee shops nga aglako iti marihuana, Ngem kangrunaan a paglatakanda dagiti babbai a naidispley iti eskaparate a mangipaay iti serbisio seksual. No adda magustuam kadakuada, mabalinmo kano lattan a kasarita ti pannakamanedierda ket bukodmon ti babai iti agpatnag, depende iti saritaanyo.”

“Kabaelam gayam ti ag-tour guide iti Amsterdam,” kinuna ni Margret.

Saan a nagtimek ni Randolf. Binay-anna ketdi nga arakupen ida ti ulimek. Agtaltalaytay iti bagina ti naisalsalumina a bara nga agtaud iti dakulap ti balasang a mangap-apros iti pingpingna.
(Adda tuloyna)