Uppat nga aldaw, tallo a rabii (Maika-10 a paset)

Madamdama, timmakder ni Margret. “Intan. Adu pay ti serkenta a siled ti kueba,” kinunana.

Tinaluntonda ti desdes a nagdalanan dagiti rinibu a dapan iti pinullon a tawen.

Pagammuan, nagsardeng ni Margret sana pinagakkub dagiti dakulapna iti ngiwatna sa nagpukkaw: “Siak ni Eba! Siak ti puon ti biag!”

Nagallungogan ti timekna iti uneg ti kueba, nagallaallatiw kadagiti bubong ken diding agingga nga in-inut a nagpukaw.

Immabay ni Randolf iti balasang sa simmublat a nagpukkaw. “Siak ni Adan! Iti paragpagko ti naggapuan ni Eba!”

Nagkatawa ni Margret sa pimmidut iti bato. “Adtoy ti mansanas. Ibilinko kenka, Adan, nga umaymo kittaben tapno maluktan ti matam iti kinapudno!”

Apagsaona, timmaray ni Margret a simmang-at.

“Alistuam, Eba, ket umayen ni Adan!” impukkaw ni Randolf.

Kellaat, napaikkis ni Margret a kagiddan ti pannakatuangna. Nakabaddek gayam iti bassit a bato a puon ti nakapukawan ti balansena.

Sakbay a makakuti ni Randolf, natuangan ti balasang ket nagkuyogda a nagduros iti baba. Napakleban ni Margret ni Randolf.

“N-nasaktanka?” sinaludsod ni Randolf ket pinerrengna ni Margret.

“S-saan,” insungbat ni Margret. Agar-arimasa ti bibigna, dadakkel ti panagangesna.

Bumangon koma ni Randolf ngem di nagkuti ti balasang. Nariknana ketdi ti pannakaidennes ti nabaknang a barukong ni Margret iti barukongna.

“Dimo pay naala ti gunggonam,” arig arasaas ti simngaw iti bibig ni Margret. “Itan ti umno a tiempo ken lugar…”

Sakbay a makasungbat ni Randolf, nariknana laengen ti nabara a bibig ti balasang a naidingpil iti bibigna. Ngem apagbiit laeng.

“Addayta, tinungpalkon ti karik!” kinunana.

“Tallo nga agek ti inkarim a dusam no maabakka,” kinuna ni Randolf. “Kurang pay iti dua.”

Nagkatawa ni Margret. Nagpabus-oy ketdi idi arakupen ni Randolf sana minalditan iti agek ti agur-uray a bibigna.

“Ammom kadi a kayarigam ti baggak a nangsilnag iti nalidem a lubongko?” inyarasaas ni Randolf.

“Apay, brown-out kadi?” inggarikgik ni Margret sa kellaat a rimmuk-at. “Adda agbuybuya kadata!”

Nagtalangkiaw ni Randolf. “Awan met tao,” insungbatna. Ginandatna nga agkan manen ni Margret ngem nakatakderen daytoy.

“Dagita, agsipsiputda,” agkatkatawa nga intudo ni Margret dagiti stalactites.

“Ba’am nga agbuyada!” kinuna ni Randolf ket ginuyodna ti balasang sana inarakup. Inagkanna manen ni Margret. Napapaut itan. Madamdama, nariknana ti ibabales ti balasang. Immirut ti panaginnarakupda ken ti panaginnagekda.
Umanges-angesda a naginnibbet.

“Kastoy kadi ti karasukyo nga Ilokano nga umagek?” umis-isem ni Margret a nangkuddot iti bakrang ni Randolf.

“Kaniak a biang, napateg ti agek ta panagpabus-oy dayta ti babai iti patpatgenna a lalaki,” kinuna ketdi ni Randolf. “Ditoy Kailokuan, saan a maagkan ti babai no saanna pay a kapkapnekan ti riknana iti lalaki.”

“Really? Well, sabali iti Netherlands. Ordinario laengen ti agek uray kadagiti di pay nagsinninged a babai ken lalaki. No adda makaam-ammom uray iti langalang laeng, mamitlonaka a bisongen ti nakaam-ammom iti pingping. Kaarigna dayta ti beso-beso dagiti Kastila. Dakkel ti inpluensia dagiti Kastila iti kultura dagiti Filipino a pakairamanan dagiti Ilokano, saan kadi?”

“Sabali ti agek iti nagbaetan dagiti agayan-ayat iti ungngo dagiti dua a ganggannaet,” kinuna ni Randolf.

“Ania ti pangyarigam iti panaginnagekta?” pinerreng ti balasang ti baro.

“Agek iti nagbaetan ti dua a parsua a natinnagen ti riknada iti tunggal maysa,” insungbat ni Randolf sana ginandat nga arakupen manen ti balasang.

“Ha! Ha! I like that,” agkatkatawa a kinuna ni Margret ngem kasla kigaw ti kapartakna nga immadayo. “Intan, adu pay a kueba ti asakenta.”

Agtimek koma pay ni Randolf ngem nagpaunan ni Margret.

Insursurot ni Randolf ti panagkitana iti likudan ti balasang. Di pay nagpukaw ti beggang iti barukongna. Agayaten ken ni Margret?

Kinamakamna ti balasang nga agpidpidut itan kadagiti bato.

“Souvenir?” sinaludsod ti baro.

“Pakalaglagipak a naminsan, iti uneg ti Callao Caves, nasarakak ti maysa nga Adan…” napnuan kaipapanan ti panangperreng ni Margret ken ni Randolf.

“Addan metten balabala ti putarek a sarita a pakainaigan ti Callao Caves,” nakuna ni Randolf.

“Tagiurayko a basaen ti saritam,” kinuna ni Margret. “No awanakton, e-mailmo kaniak iti Amsterdam.”

“Diak pay sigurado no kasano nga igibusko,” kinuna ni Randolf.

“Kayatmo a tulonganka a mangigibus?” manutsutil dagiti balikas ti balasang.

(Adda tuloyna)