Uppat nga aldaw, tallo a rabii (Maika-12 a paset)

Nagallungogan iti mikropono ti yuunegen dagiti delegado ta mangrugin ti programa. Nakasangpet kanon ti gobernador.

Inayaban ni Mang Arthur ni Margret nga agtugaw iti sango. Addan a nakatugaw iti entablado da Manang Pacing ken dadduma a sangaili.
Nagpalikud ni Randolf ket napan nakikatugaw kada Manang Espie. Aktibo a presidente ti Gumil-Ilocos Sur ni Manang Espie.

“Naimbag man ta naisaparmo ti immay nakikonbension, Manang,” kinuna ni Randolf.

“Uray kaadu ita ti trabaho iti eskuela ta panagseserran,” kinuna ni Manang Espie, “ngem maminsan la iti makatawen daytoy konbensiontayo isu a diak la ketdi palabsen.”

“Umayakto agpasiar idiay Sinait ta tumulongak nga agedit kadagiti sarita a maipablaak iti Talged, Manang,” kinuna ni Randolf.

Adda binulan a newsletter nga ipabpablaak ti Gumil-Ilocos Sur. Sangapulo ket dua a panid a nakaipalaonan dagiti ababa a sarita, daniw ken salaysay.

“Yamanek unay, adingko, ta diak maisaparen no kua iti kaadu ti trabahok,” insungbat ni Manang Espie. “Ngem panagkitak ket addan sa nakatinnagan ti riknam.” Umis-isem ni Manang Espie a nangisungo ken ni Margret.

“Nabiit pay laeng a nagam-ammokami, Manang,” kinuna ni Randolf.

“Kadagitoy a panawen, saanen nga uso ti nabayag a panagdaton,” kinuna ni Manang Espie. “Ti importante, ket kapkapnekanyo ti riknayo iti tunggal maysa. Makaguraak la ketdi no didak kumbidaren no dakayo ti agkagasat ken ni Margret.”

“Ha, Ha, Ha, adayo pay dayta, Manang. Ngem no kas pagarigan dakami ti agkagasat, sikanto ti maysa a ninang,” kinuna ni Randolf idinto a timmaliaw iti entablado. Nagsabat ti matada ken ni Margret a kumitkita met gayam iti ayanda ken ni Manang Espie.

Immanges ni Randolf iti nauneg. Nasarakanna kadin ken ni Margret dagiti saguday ti babai nga isaklangna iti altar?

Nairugi ti programa. Impaay ni Mang Arthur ti panglukat a bitla. Simmaruno ti panagsala ti sumagmamano a chapter organization ti Gumil-Cagayan.

Naiyam-ammo ti gobernador. Natayag a lalaki, nabaneg ken malalaki ti takderna.

“Igunamgunamko kadakayo a suratenyo ti nanumo a lugarmi inton addakayo iti probinsiayo. Adu dagiti maipagpannakkelmi a beauty spots ditoy Cagayan. Kas iti Buntun Bridge, ti kadakkelan a rangtay iti pagilian a pagballasiwan iti karayan, ti Basilica Minore of Our Lady of Piat, dagiti centuries-old a simbaan, dagiti nadalus a beaches, dagiti coastal towns ti Babuyan, Fuga ken Palawi Islands a mabalinyo a pagpaliwaan. Kas ditoy Peñablanca, nalataken ti Callao Caves.” paset ti panagbitla ti gobernador.

Ababa laeng ti bitla ti gobernador.

“Inton alas sais, mabuyayo ti iruruar dagiti rinibu a panniki manipud iti taengda. Inton bigat, sapaenyo ti bumangon ta agsublidanto met laeng iti alas sais,” impakaammona.

Nakitungtong ti gobernador kadagiti mannurat kalpasan ti programa. Napasig ti tapikna. Inkarina ti agtultuloy nga itutulongna iti panagdur-as ti Literatura Ilokana.

Kinita ni Randolf ti oras iti pungupunguanna. Alas singko y media. Lumneken ti init.

Apagisu met nga umasideg da Manang Pacing ken Margret.

“Dandanin agtangep ti lawag. Buyaentayo ti panagruar dagiti panniki, Manang,” kinuna ni Randolf.

“I surely love it,” kinuna ni Margret.

“Kadkadduaem man ngarud ni Margret, Randolf,” kinuna ni Manang Pacing.

Impakdaar ni Arthur a bayat ti pannakaisagana ti pangrabii, mapan urayen dagiti delegado ti iruruar dagiti panniki.

Simmurot da Randolf ken Margret kadagiti naruay a delegado a nagturong iti nalayang a paset ti bantay. Nagpatapaw da Randolf, pangadaywen kadagiti kaduada. Intudo ni Randolf ti sirok ti dina ammo ti naganna a kayo. Adda dakkel a bato a naimula iti asideg ti puon ti kayo.

Ditoy, nawaya a makitada ti bantay a namnamaenda a pagruaran dagiti panniki.

“Pattapattam a pagturongan dagiti panniki iti agpatnag?” inamad ni Margret idinto a nagbaniekes a nangwanawan iti aglawlaw.

“Adda kano pay bunggoy a makadanon iti Subic,” kinuna ni Randolf. “Ngem sakbay nga aglawag, agsublida met laeng ditoy.”

“Amazing!” nayesngaw ni Margret.

Madamdama, mangrugin nga agdalapdap ti sipnget. Sangkatangad ni Randolf ti bantay. Iti relona, eksakton nga alas sais.

“Nagtugaw ni Margret iti abay ni Randolf. “This is a lover’s paradise,” kinunana.

“Kas iti paraiso da Adan ken Eba?” tinaliaw ni Randolf ti balasang ket pinadasna a tukoden ti karirikna daytoy. “Kadagiti agayan-ayat, uray sadino, paraiso latta,” kinunana.

Narikna ni Randolf ti panangirakus ni Margret ti takiagna iti siketna sa ti panagsadag daytoy iti likkuong ti abagana.

“Tell me, manodan a nangibagaam iti ayatmo?” sinaludsod ni Margret.

“Duan. Nagtungpalda laeng iti pannakapaay.”

“Apay? Adda dakkel a gapu?”

“Wen. Ti maysa, insukatnak iti baknang. Ti maikadua, sobra ti kinapaidamna. Adda limitasion ti panagsolomi. Nagpatinggak laeng iti agek. Naminsan, inserrekko iti otel. Dakkel a biddutko. Ita, napukawkon ti panagtalekna.”

“You poor boy!” pinisel ni Margret ti dakulap ni Randolf. “But it’s not the end of the world. Makasarakkanto iti sabali.”

“I think I have found the right woman for me,” kinuna ni Randolf.

“Aginnagawen ti sipnget ken lawag!” kinuna ketdi ni Margret. Nagsadag iti abaga ni Randolf. Inlagana ti ramayna iti ima ti baro. “This is the most romantic moment between lovers.”

Saan a nagtimek ni Randolf.

“I like you, Randolf,” inyarasaas ni Margret. “Do you like me, too?”

Nagsabat dagiti matada. Nabara ti sang-aw ni Margret iti tengnged ni Randolf. Immirut ti petpetna.

“Dinak pay sinungbatan…”

“Kasapulan kadi pay?” kinuna ni Randolf idinto a pinidilna ti timid ti balasang. Diningpilna ti bibig ni Margret.

Napaut a naginnagekda.

Pagammuan, nakangngegda iti kasla parpar a bulo nga aggapu iti bantay. Pimmigsa a pimmigsa, umas-asideg iti yanda.

“Rimmuaren dagiti panniki!” rimmuk-at ni Margret.

Naggiddanda a timmangad. Iti panaginnagaw ti sipnget ken lawag, naitangkarang iti matada dagiti rinibtibu a panniki, kasla napuskol nga asuk iti panagtayabda, agkalkalawikiw, agturong iti amianan, iti pagdakiwasanda a disso nga isuda laeng ti makaammo.
(Maituloyto)