Uppat nga aldaw, tallo a rabii (Maika-16 a Paset)

Inwalin ni Randolf dagiti saludsod iti panunotna ket impamaysana a binuksilan dagiti naisalip a daniw. Pinilina dagiti innem a kapintasan tapno dagitoy ti pagpilianna a pakaitedan kadagiti kangrunaan a gunggona.

Kalpasan ti panangarisitna kadagiti naisalip a daniw, inyilad ni Randolf.  Pinadasna ti rumidep uray apagbiit laeng. Sigurado a mapuyatanda iti daytoy a rabii agsipud ta makoronaan ti mangabak a Miss Gumil-Filipinas. Maaramid ti last canvassing iti alas kuatro. Uppatda laeng a kandidata. Kapigsaan ti Miss Hawaii agsipud ta suportaran amin a gunglo dagiti mannurat iti nasao nga estado ken dadduma pay a kaparangetna nga isla.

Ngem napaidam ti ridep.

Nagwingiwing ni Randolf. Adda panagbabawina no apay a dina tinulnekan ti panaglinnailoda ken ni Margret idi rabii. No napasamak koma dayta, ikutnan ti napigsa a garantia a kukuanan ti balasang. Ngem kayatna met a no ikutanna ni Margret, daytay aggubbog iti puso daytoy. Kas iti panangsibbol iti kalkalainganna kaluom a bunga tapno nasamsam-it ken ad-adda a makapnek ti pannanganna.

Kinapudnona, saan a nailaksid kadagiti gagayyemna nga adda main-inaw a riknana ken ni Margret.

Idi rabii, saan a sinardengan dagiti gagayyemna agingga iti dina inlatak ti gapu ti isasangpetna a sibabasa idi daydi rabii a nagdigos ni Margret iti karayan.

Kapilitan nga insalaysayna ti napasamak. Nupay kasta, dina dinakamat ti simngay a duaduana.

Kasla mariknana manen ti nabara a bibig ni Margret a nangdengngep iti bibigna,  kasla dengdengngepen manen dagiti ramay ni Margret a nagdakiwas iti nadumaduma a paset ti bagina, kaslada  agtaltallukatik a babassit a koriente a nagsaknap iti kinataona.

Bimmangon idi agdalagudog dagiti tallo a pagayamna, kaduada ti sumagmamano a mannurat a taga-Candon nga immuneg iti quartersda.  Adda awitda a sangakahon a serbesa.  Ammona lattan a nauman nga agdengdengngeg dagitoy kadagiti lektiur ket kaykayatdan ti aggiinom iti kuartoda.

“Ne, uminomka ta di puro agsangsangit a daniw ti basbasaem,” inyawatan ni Rey ni Randolf iti serbesa.

“Nakitak nga intulodmo ni Margret iti paradaan dagiti traysikel. Apay a dimo kinuyog?” inkalbit ni Robert.

“Awan makagapu a pawilak ni Margret iti kayatna a papanan,” insungbat ni Randolf.

“Pari, iti daydiay a lapsat ni Margret, uray santo, sakaban la ketdi ti demonio,” kinuna ni Rey.

“Aniakayon sa, baka diyo ammo, agdardaran ti puso ni Randolf,” inkidday ni Freddie.

“Annay pusok, annay! Nasaem, naut-ot la unay…” inyayug dagiti tallo.

Dina ammo a sipsiputan gayam ni Rey.

“Itay pay la a dika maun-uni,” kinunana. “Adda problema?”

“A-awan,” insungbat ni Randolf.

“Baka sakit nga amoritis daytan,” insalingbat ni Freddie.

“Wenno essem a diak kalipatan,” inyuyeng ni Robert nupay disintonado ti bosesna.

“Adda ammok a remedio, aniaman dayta a rikriknaem,” inkatek ni Rey ti ramayna. “Intayo agpalned iti oras dita Hot Stuff. Nalapsat diay serbidora, sika. No agalibtakka, mairuarmo pay siguro. Sigurado, mailiwliwagmo aniaman a problemam a dimo maipeksa.”

Kinita ni Randolf ti oras iti pungupunguanna. Alas singko y media. Apay ketdin a saan? nakunana iti unegna. Total, naiwakasna metten ti pagrebbenganna kas hurado iti on-the-spot poetry writing contest. Makaammonton ni Mang Hermie, chairman ti pasalip, a mangiyawat ti gunggona kadagiti nangabak.

“Okey, mayatak iti singasingmo. Ken blow-outko metten kadakayo tapno agtalnakayon a mangsasairo kaniak.”

“Dayta a ti naimbag a gayyem,” impasablog ni Robert. “Ammona a taliawen dagiti nakapimpiman a kakailianna…”

“He, dinak man lamlamiongen. No kastakayo, ibabawik laengen….”

“Don’t do that, my friend. Ikarimi, plasteranmi ti bibigmi bayat ti panaginomtayo,” inkidday ni Rey.

Kalpasan ti panagpellesda, rimmuardan iti quartersda. Simmurot da Rex ken Mikoy, dua  a delegado manipud iti Candon City, idi maammuanda ti papananda. Agpapaay dagitoy a reporter iti maysa a lokal a radio station iti siudad.

Agkikinnantiawda a nangtarengteng iti kalsada nga agturong iti sungaban ti Callao Resort. Adda nataratar a paggiinoman iti sungaban.

Immuneg da Randolf iti Hot Stuff. Awan pay ti kustomer iti uneg. Isuda la ketdi ti mangbusat.

Pinagabayda  ti dua a lamisaan.

Naisem nga immasideg ti manager. Nagorder ni Randolf iti sagduduada a serbesa ken pulotan.

“Adda kabarbaro a GROmi,” inkissiim ti manadier. “Ania ti makunayo, paayabak?”

“Wen, mangalatayo iti kateboltayo tapno naragragsak ti tungtongan,” inyarasaas ni Freddie.

“Madamdama, nasapa pay,” kinuna ni Randolf.

Madamdama, impasaksaken ni Rey ti sintonado a kantana iti videoke.

Kellaat a nagkiriring ti selpon ni Randolf. Ni Margret ti tumawtawag.

“Addaak pay ditoy Tuguegarao,” kinuna ti balasang. Nalpaskon ti impamision ti editormi. Ngem diak kayat pay ti agsubli dita. Kayatko ti agpalpaliwa ditoy siudad tatta rabii ngem awan ti kaduak. Urayenka iti Nikolai Inn, ok?”

Sakbay a makasungbat ni Randolf, naiserran ti selpon.

“Sino ti timmawag?” inamad ni Rey.

“Ni Margret. Adda idiay Nikolai Inn. Agmaymaysa  Kayatna a kaduaek…” nakuna ni Randolf.

“Oh, what are you waiting for, my friend…. abante na!” kinuna ni Freddie.

Ngem sabali ti adda iti panunot ni Randolf. Nikolai Inn… dayta ti otel a nangegna a pagsinnarakan ti datdatlag a babai ken ti lalaki. Saanen a nairanrana laeng a dita met laeng nga otel ti pagkitaanda ken ni Margret!

(Adda tuloyna)