Sarita: Uppat nga aldaw, tallo a rabii (Maika-14 a Paset) | Tawid News Magazine - Weekly Ilocos News 📰

Uppat nga aldaw, tallo a rabii (Maika-14 a Paset)

Nagpasurongda agingga iti nailingedda kadagiti cottages. Nagsardengda iti panglayangen a paset. Medio nalawag ditoy ta  makadanon ti silnag ti silaw manipud iti poste ti elektrisidad.

Immadayo bassit ni Margret ket nagsukat iti bathing suit iti panipngeten a paset iti ampir ti napidipid a kayo nga alad. Nagsubli ket impalladawna lattan ti pantalon ken tisirtna iti sanguanan ti baro sa nagtaray a timmapog iti danum. Bimmatok iti napaut. Sa rimkuas a limmung-aw.

Kasla adda nagsullat iti karabukob ni Randolf idi dayasen ti nakusnaw a lawag ti pakabuklan ni Margret a kasla diosa a limmung-aw manipud iti lansad ti karayan.

“Umaykan agdigos. Kalkalainganna ti lamiis ti danum,” inyawis ni Margret.

“Buyaenka laengen,” kinuna ni Randolf. Ita pay laeng nagtagilangan iti panunotna ti balabala ti maysa a sarita. Wen, pauluanna iti Diosa iti Let-ang ti Rabii.

“Saurka,” kinuna ni Margret. “Inkarim a kaduaennak nga agdigos ita a sardam.”

“No insakbaymo koma, napanak gimmatang iti swimming trunks,” kinuna ni Randolf.

Nagkatawa ketdi ni Margret ket naglangoy a nagpatengnga iti karayan. Madamdama ti laengen ulona ti sagpaminsan a maipasir ni Randolf.

“Dika unay agpatengnga. Adalem dita!” impukkaw ni Randolf.

Nangngeg ni Randolf ti kanabsuok iti ibabatok manen ni Margret. Timmakder ket winanawananna ti karayan. Nakitana ti panagbisngay ti karayan idi tumpuar ni Margret.

Bimmatok manen ti balasang. napapaut itan. Nagtalinaed a nakatutok ti mata ni Randolf iti paset a bimmatokan ni Margret. Ngem awan maipasirna nga anniniwan wenno mangngegna a parasapas.

Dua… tallo… lima a minutos ti limmabas ngem kaskasdi a dina maipasir a tumpuar ti balasang. Nagbalaw ni Randolf. Nagbetted ti saka ni Margret? Apay nga awan ti nangngegna a panagpaarayat?

“Margret! Margret! Sumungbatka!” impukkawna.

Ulimek.

Saanen a nagpangadua ni Randolf. Inuksobna ti bado ken pantalonna. Inuksotna ti sapatosna. Timmapog iti danum. Naglangoy a nagturong iti naudi a nakakitaanna ken ni Margret.

“Margret! Yanmo?”

Bimmatok. Panipngeten iti uneg ti karayan ngem adda maipasirna a lawag manipud iti bulan.

Limmung-aw. Immanges iti nauneg sa manen bimmatok.

Iti di unay pangadaywen iti yanna, naipasirna ti balasang nga agkakapsuten nga agkaykayaw-at.

Siniket ni Randolf ni Margret sana tinulongan a limmung-aw. Inrakusna ti takiagna iti tengnged ti balasang sana impaigid. Sinakruyna nga intakdang.

Idisso koma ni Randolf ni Margret iti kabatuan ngem saan nga inakkal daytoy ti takiagna iti tengngedna.

“Agtugawta biit,” kinuna ni Margret. “Bay-annak a mangpasubli iti pigsak.”

“Ania ti napasamak?” inamad ni Randolf. Nariknana ti panagsadag ti balasang iti abagana.

“Nagbetted ti sakak,” kinuna ni Margret. “Naimbag ta timmapogka, no saan, nalmesak koman.”

“Apay a dika nagpaarayat?”

“Diakon napanunot dayta. Sinallukobannakon ti buteng,” kinuna ni Margret.

Narikna ni Randolf ti napudot a sang-aw ti balasang iti barukongna sa ti panagareng-eng ken yiirut ti arakupna iti siketna.

“My great hero!” inyarasaas ni Margret. “Ever ready to save a lady in distress!”

Nagkaradap ti nakabarbaran a bibig ti balasang iti pingpingna.

Nagkidem ni Randolf. Nariknana ti in-inut a pannakareggaay ti kinatalinaayna.

Kellaat adda simngay a duadua iti panunot ni Randolf. Saan ngata a nagpammarang ni Margret a nagbetted ti sakana tapno tingitingen ti balasang no salaknibanna iti peggad?

Iti panagkitana, lumalangoy ni Margret. Ammona ti aramidenna iti kaadda ti peggad. Kasla saan a nakappapati a sinallukoban ti buteng isu a di nakapagpaarayat.

Nalagipna ti panangkarit ni Margret kenkuana no asino ti umuna a makadanon iti tapaw ti agdan nga agtunged iti Callao Caves.

Masinunuona nga atleta ni Margret agsipud iti kadarasna a nanglabas kenkuana. Ngem iti di ammo a gapu, nagarukong idi asidegen iti tapaw ti agdan. Naibbusan kano iti pigsa. Ad-adda itan a patienna nga inggagara ni Margret ti nagpaabak.

Ngem ania ti magun-od ni Margret iti panagpaabakna? Inikkanna ni Randolf iti gundaway a mangagek kenkuana.

Sa ita, impambar ti balasang a nagbetted. Agpayso ngata?

Wenno adda laglagaen ni Margret a balabala nga isu laeng ti makaammo dagiti pagkutienna a karakter ken ti paggibusanna?

Ngem nagpukaw dagiti panagduadua ti panunotna idi nariknana ti nalamuyot a dakulap ni Margret a nangapros iti pingpingna sa ti nabara a sang-aw daytoy a nangdengngep iti tengngedna.

“I like you, Randolf,” arig-arasaas ti boses ni Margret.

Sakbay a makasungbat ni Randolf, nariknana ti yiirut ti arakup ni Margret sa ti pannakadingpil ti bibigna iti agek.

Mangrugin a marba ti kinatalinaay ti baro.

Ah, kayarigam, Margret ti karayan – nalailo, ken adalem a masapul a lansadek tapno matakuatak ti misteriosa a kinataom! intalukatik ti panunotna.

Agun-unnoyen ti karayan, nasam-it a samiweng a mangrugin a mangitayok kenkuana iti arpad dagiti sabong!

Ah, kayarigam, Margret ti karayan – nalailo, ken adalem a masapul a lansadek tapno matakuatak ti misteriosa a kinataom! intalukatik ti panunotna.

Agun-unnoyen ti karayan, nasam-it a samiweng a mangrugin a mangitayok kenkuana iti arpad dagiti sabong!

Saanen a nakaibtur pay. Diningpilna ti bibig ti balasang. Napaut.

Uray la umanangsabda a dua idi naginnibbetda.

Ngem madamdama, nagsinnapul manen dagiti bibigda idinto a nagdakiwas dagiti dakulapda iti kapatagan ken katurodan, iti amin a kasulinekan ti kinataoda.

Kellaat, rimmuk-at ni Margret.

“Apayen?” nasdaaw ni Randolf.

“Saan a daytoy a disso,” kinuna ni Margret. “Inton rabii no bigat…. agpapaskanto iti Nikoli Inn….”

Kalpasan ti panangekna ken ni Randolf, timmakder ti balasang sa nagpelles. Madamdama, sipapartaken a nagsubli iti cottage.

Nabayag a saan a nagkutkuti ni Randolf iti yanna. Nannanamenna pay ti dandanina pannakasibbol ti langit.

Pagammuan, bimmaringkuas idi limteng iti panunotna ti nagan ti otel nga imbaga ni Margret a papananda.

Dayta met la ti nagan ti otel a pangsarakan ti datdatlag a babai iti kinasinnarakna!

(Maituloyto)