Footer

Uppat nga aldaw, Tallo a Rabii

Sarita ni Salvador A. Espejo
Maika-17 a Paset

 

Nalamiis ti puyupoy a sumabatsabat iti traysikel a naglugananna ngem alusiisen ni Randolf. Ita pay laeng, aglalaok ti rikna nga immapon kenkuana. Gagar? Amak? Ngem no mabalin, guyodenna ti oras tapno madanonna ti lugar a pagsarakanda ken ni Margret.

Insaruagna ti panagkitana iti daya, iti paset a di magaw-at ti lawag ti silaw ti traysikel. Sipnget ken lawag? Iti daytoy a rabii, parmeken ti sipnget ti lawag iti pannakaitugkel ti gayang ni ayat iti nabaknang a barukong ti biag. Maysa a simbolismo?

Ngem saan a maipalawag ni Randolf no apay nga alusiisen. Adda agparparikna kenkuana a dina maibuksilan. Adda kadi pakainaigan daytoy iti otel a pagsarakanda ken ni Margret?

Manen, simmiplot iti panunotna ti imbalikas ti datdatlag a lalaki iti babai a kinasinnarakna iti surong ti karayan: Positibo ti isasangpet dagiti martilio.

Kapkapnekanna itan a saan a martilio ti maisanglad. Code laeng daytoy. Ti laeng pakaisangratanna ti makaawat. Maar-aramat dayta kadagiti mailibas a kargamento. Esmagling? Ngem ania?

Kas nakuna ni Manang Pacing, nagaammoda laeng ken ni Margret bayat ti panagbiahe ti eroplano nga agpa-Pilipinas. Panagkitana ket saan a nairanrana laeng ti panagpa-Ilokos ni Margret. Posible nga ammona nga adda maangay a konbension iti Peñablanca ket nakiam-ammo ken ni Manang Pacing tapno maawis iti taripnong.

Ngem ania koma ti gagara ni Margret iti Kailokuan? Iti panangamirisna, saan a nakapappati nga ibaon ti editorna tapno adalenna ti kultura ken kaugalian dagiti Ilokano. No plaka koma, nadudogen dagiti sinurat maipapan iti kultura ken kaugalian dagiti Ilokano. Adda kadi pay dagiti saan a nasurat maipapan iti Kailokuan?

Saan ngata nga adda naun-uneg a gagara ni Margret iti Cagayan? Ngem ania?

Di napupuotan ni Randolf, nakadanon gayamen iti paradaan dagiti traysikelan iti Tuguegarao. Nagdalapdapen ti sipnget ngem ti nangisit a mantona ket dina nabaelan a sinallukoban dagiti nagsindin a narangrang a bumbilia a nangsilnag kadagiti nadumaduma a pasdek-negosio.

Dimsaag ni Randolf sa nagplete. Dinamagna no sadino ti pakasarakan iti Nikolai Inn.

“Ammok daydiay, Manong. No kayatmo, itulodka sadiay,” manutsutil ti isem ti drayber a nagkuna.

“Sige, itulodnak sadiay,” insungbat ni Randolf.

Bayat ti panagdaliasat ti traysikel iti puseg ti siudad ti Tuguegarao, namrayan ni Randolf a binuya dagiti malabsanda. Damona a maadakan ti siudad, ngem panagkitana, ket narang-ay metten a siudad ti Tuguegarao.

Nagmenor ti traysikel iti sanguanan ti tallo-kadsaaran a pasdek. Napatak a mabasa ti Nikolai Inn a naimuntar iti parupa ti otel.

“Dimo isardeng iti sango. Ilabesmo,” imbilin ni Randolf.

Nakalawlawa ti isem ti drayber a nagtungpal.

Dimsaag ni Randolf sa nagplete. Nagtalangkiaw. Nasapa pay ngem narasayen dagiti agpaspasiar a tattao. Nupay kasta iti ballasiw ti kalsada, adda sumagmamano a restobar.

Nagmattider ni Randolf iti abay ti poste ti koriente idinto nga insaruagna ti matana iti pasdek. Dua a babbai ti nakatugaw iti likudan ti information desk.

Tinawaganna ni Margret babaen ti selpon.

“Addaak iti sango ti Nikolai Inn,” kinuna ni Randolf. “Ania a number ti kuartom?”

“Ow, diak ninamnama a makaumayka a dagus,” insungbat ni Margret. “Rimmuarak biit. Adda pay as-asikasuek.”

“Umayak ditan yanmo.”

“Pagbiitak laeng. Mga 30 minutes. Inka agpalabas iti oras dita asideg a restobar. Agserbesaka, pangur-urayam kaniak.”

“Ok,” kinuna ni Randolf sana inserra ti selpon.

Bimmallasiw iti kalsada ni Randolf sa simrek iti restobar. Manmano ti kustomer iti uneg. Nasapa pay ngamin.

Pinilina ti lamisaan iti suli. Manipud ditoy, nawaya a makitana dagiti rummuar ken umuneg iti otel.

Nagorder iti beer iti immasideg a serbidora.

“Ania ti kayatmo a pulotan, sir?” kinuna ti serbidora.

“Beer laeng,” insungbatna.

Naibbusnan ti beer nga inin-inutna nga ininom ngem awan pay ni Margret.

Kinitana ti oras iti pungupunguanna. Alas otson ti rabii.

Nagorder iti sabali a beer ken pulotan a lechon kawali. Napia la a pamedpedna iti bisinna.

Magudduanan ti botelia ngem awan pay ni Margret. Napanan daydiay a babai? dina naaluadan ti nagsakuntip.

Manen, simngay iti panunotna ti suspetsana nga adda laglagaen ni Margret ngem dina matiliw no ania dayta.

Nagkiriring ti selponna. Ni Margret.

“Mautoyankan?” sinaludsod ti balasang. “Umayakon.”

“Kayarigak ti ubing a mangur-uray iti regalo ni dadina daytoy marikriknak ita,” kinuna ni Randolf.

“Adda pagsasao: Ti makaanus, makauray iti grasia,” kinuna ni Margret.

Timmammidaw ti isem iti bibig ni Randolf. Daytan ti kasam-itan a balikas a nagaon iti bibig ti balasang!

Ngem kellaat a napunas ti isemna idi mairupaanna ti maysa kadagiti dua a lalaki a nagsaruno a rimmuar iti otel. Ni Marco!

Apay nga adda ni Marco iti Nikolai Inn?

(Maituloyto)