Uppat nga aldaw, tallo a rabii (Maika-19 a Paset)

Impusot ni Randolf ti bagina iti nalamuyot a tugaw iti sanguanan ti panakkelen a TV. Madama a maipabpabuya ti daan a pelikula ni Harrison Ford. Nalamiis ken nabanglo ti angin nga ipugpugso ti aircon. Adda ti kuartoda iti maikadua a kadsaaran ti Carylle Hotel.

Naglukat ti ridaw ti pagdigosan ket rimmuar ni Margret a mangpumpunas iti nabasa a buokna babaen ti tualia.

Kasla nagserra ti aangsan ni Randolf idi mataldiapanna ni Margret. Dina naaluadan ti panagdakiwas dagiti matana iti pakabuklan ti balasang ket nagsaltekda kadagiti dua a munturod nga agpilit a rumkuas iti tisirt. Ammona lattan a saan a nagaruat iti bra ti balasang. Iti apagdarikmat, nagpukaw dagiti adu a saludsod nga agam-ampayag iti panunotna.

“Agdigoska pay satanto rummuar?” inamad ni Margret idinto a nagtugaw iti pingir ti katre.

“Ditoytan,” kinuna ni Randolf. “Nagorderak iti mainom ken pangrabii. Kabayatanna, adda sumagmamano a kayatko a malawlawagan.”

“Aniada?”

“Ania ti napateg a linaon ti bagmo a kayat a matagikua ti mannanakaw?” nakuna ni Randolf.

“Dayta ti tattay pay la a pulpilinglingen ti panunotko. Ngem awan met ti napateg a naggian ti bag malaksid dagiti akin-uneg nga aruatek.

“Awan ti doliar, traveller’s check, wenno napateg a dokumento?”

“Diak agikuykuyog iti dakkel a gatad no agbiaheak,” kinuna ni Margret. “Awan ti napateg a dokumento a kuyogko iti iyaayko ditoy. Dayta laeng no napateg diay surat nga impaw-it ti gayyem ti editorko a maited iti nobiana.”

“Adda naisigpit a kuarta iti surat?”

“Adda 100 guilders a para iti nobiana. Isu ti napanko intunton ta dinamag ni boss no naitedkon. Ngem diak nadanon ti tao a pangitedak.”

“No kasta, adda kenka ti surat? Mabalin a kitaen?” kinuna ni Randolf.

Kinaut ni Margret ti nakupin a surat iti makinsango a bulsa ti maong a pantalonna sana inyawat ken ni Randolf.

Minira ni Randolf ti sobre. Sigurado nga ababa laeng ti surat ta naingpis ti sobre. Binasana ti nagan a naisurat iti ima iti rabaw ti sobre: Janette Amargo, 123 Tuguegarao City.

“Ti pakasdaawak ket awan kano met ti kasta a nagan nga aggigian iti dayta nga adres, segun iti akinkukua iti apartment,” kinuna ni Margret.

Insubli met laeng ni Randolf ti surat.

“Adda natayag ken nabaneg a lalaki a pinanawak iti restobar a nagginumak,” kinuna ni Randolf. “Suspetsak a sika ti ur-urayenna. Sinurotnaka iti otel.”

“Awan ti am-ammok a nabaneg ken natayag a lalaki,” kinuna ni Margret. “Ngem adda nakitak a kasta ti deskripsionna iti pasilio a timmaray nga immulog iti agdan idi rimmuarak iti kuartok kalpasan a naguni ti fire alarm.”

“Nakitak a nagkuyogda ken Marco a rimmuar iti otel kalpasan a timmawagak kenkuana.”

“How come nga adda ni Marco ditoy?” kinuna ni Margret. “Is he not a delegate in the convention?”

“Kasano kabayag a nagam-ammokayon ken ni Marco?” sinaludsod ketdi ni Randolf idinto a pinerrengna ni Margret.

“Idiay laeng pagkonbensionan,” insungbat ni Margret. “Apay a nasaludsodmo dayta?

“Adda kadi tulaganyo nga agsarak iti Nikolai Inn?”

“Don’t tell me that you’re jealous, Randolf!” naggarikgik ni Margret.

“I’m serious, Margret. Sungbatannak koma.”

“Well, awan ti tulaganmi. Naminsan laeng a nagkitakami. iti pagkonbensionan,” nagdalikepkep ni Margret. “Are you satisfied?”

“Adda nakitak idi a kasla papel nga inyawatna kenka,” kinuna ni Randolf. “Ania daydiay?”

“Wow, mannuratka nga agpayso ta managpaliiwka. No diak mariro, adda birbirokenna a tao iti pagkonbensionan. Imbagak a sangsangailiak met. Adda intedna a papel a nakailanadan iti nagan diay birbirokenna.”

“Babai wenno lalaki ti birbirokenna?”

“Babai. Diak ammon no nagkitadan iti daydiay birbirokenna.”

“Namin-ano a daras a kinapatangnaka ni Marco?”

“Daydi laeng pannakakitam kadakami iti igid ti karayan,” kinuna ni Margret.

“Idi karuruarta manipud iti Callao Caves, nakitak ni Marco a naggapu met iti kueba,” kinuna ni Randolf. “Does that mean anything to you?

“So what? Nairanrana laeng siguro. Kas kadata, mabalin met a napan nagdakiwas iti uneg ti kueba.”

Timmakder ni Randolf sa nagmattider iti tawa. Imbakalna ti panagkitana iti ruar. Saanna a magustuan dagiti pasamak.

Naguni ti door bell.

“Room service,” kinuna ti serbidor.

Apagbingi laeng ti ridaw nga inlukat ni Randolf. Sana laeng inlukat a naan-anay idi kapkapnekanna nga awan ti sabali a kadua ti serbidor.

Indisso ti serbidor ti inorder ni Randolf iti bassit a lamisaan.

“Adda pay sabali nga orderyo, sir?” inamad ti serbidor.

“Awanen,” kinuna ni Randolf sana impabulsa ti tipna. Nagyaman ti serbidor sa rimmuar iti siled.

Linuktan ni Randolf ti botelia ti red wine sana pinakbuan dagiti baso. Inyawatna ti maysa ken ni Margret.

“Cheers!” kinunana.

“Here’s to a memorable night for us!” kinuna ni Margret sana intik-ol ti basona iti baso ni Randolf. Naggiddanda a nangitangad iti basoda.

“Adda pay maysa a saludsodek…” kinuna ni Randolf idinto nga indissona ti basona.

“Stop! Don’t talk anymore!” impakurus ni Margret ti tammudona iti bibig ni Randolf.

Sakbay a makasungbat ni Randolf, nairakusen ni Margret dagiti takiagna iti tengngedna sa nariknana ti nabara a bibig daytoy a nagdakiwas iti lengnges ken pingpingna ket iti panagsinnarak ti bibigda, naginnarakupda iti nairut agingga iti natuangda iti nalamuyot a katre.

“Do you find me irresistible, Randolf?” sinaludsod ni Margret.

Sumungbat koma ni Randolf ngem kellaat a natapayana ti mugingna. Apay nga agtayyek metten ti lubong?

“Hey, the room is spinning!” nakuna met ni Margret.

Bimmangon ni Randolf ngem kasla awan pigsa dagiti sakana ket naarinuknok iti sakaanan ti kama.

Sakbay a napukawna ti puotna, simmelsel iti panunotna: nalaokan iti pagpaturog ti arak nga ininumda!

(Adda tuloyna)