Uppat nga aldaw, tallo a rabii (Maika-20 a paset)

SIPNGET ti naitangkarang kenkuana idi imulagat ni Randolf dagiti matana. Bimmangon ket kasla agkakapsut a nagsadag iti uluanan ti kama. Medio nadagsen ti ulona.

Kellaat a nalagipna ni Margret!

“Margret?” arig arasaas ti timekna idinto a pinadas a saruten dagiti matana ti kasipngetan. Ngem naulimek iti uneg. Ti laeng nakapsut nga arasaas ti aircon ti mangegna.
Yan ni Margret?

Timmakder ket nagar-arikap a nagturong iti namnamaenna a yan ti switch. Adda nadungparna a natangken a banag ket dandani naidaramudom. Ti gayam bassit a lamisaan iti sango ti tokador.

Naarikapna ti switch ket inlitekna. Nadayas iti lawag ti kuarto. Nagkiremkirem iti pannakasisirapna.

Inwarasna ti panagkitana iti kuarto. Ngem awan ni Margret.

Nagparidaw ni Randolf sana sinukimat ti lock. Nakaserra ti ridaw.

Asinoman dagiti simrek iti siled, propesionalda la ketdi, immapay iti panunotna. Saan nga asi-asi ti makastrek lattan iti kuarto ta maluktan laeng ti ridaw babaen ti electronic card.

Impusot ni Randolf ti bagina iti tugaw. Pinadasna a pinagsisilpo dagiti pasamak.

Kapkapnekanna itan nga adda pagpaturog a nailaok iti ininumda a red wine. Naikkaten ti seal ti arak idi iyuneg ti serbidor.

Tinaldiapan ni Randolf ti lugar a nakaikabilan ti mesita a nangidissuan ti serbidor iti arak ken pangrabiida. Naipaigiden ti mesita ken awanen ti arak, plato, ken pangrabiida. Napunasan pay ketdin ti rabaw ti mesita. Tapno mapukaw aniaman a lemma ti ramay iti mesita?

Inkallatik ti panunotna: Ni la ketdi Margret ti gagara dagiti simrek iti kuarto. Ania ti m
Nagtalinaed a kuretret ti muging ni Randolf idinto a tinimbangna no ania ti aramidenna. Agpulong iti polis? Ngem saan ngata nga agpeggad ti biag ni Margret no agpatulong iti polis?

Idi agangay, inkeddeng ni Randolf a saan pay nga agpulong iti polis. Umuna, awan ti naan-anay a detalye a maibagana no apay a naitalaw ni Margret. Saanna nga am-ammo dagiti nangiyulog ken ni Margret. Saanna nga ammo no ania ti motiboda. Ti laeng masinunuona, adda napateg a banag a masapulda ken ni Margret isu nga intalawda.

Aniaman dayta, saanda nga an-annuen ti balasang agingga iti saanda a maala ti kayatda.
Napanunot ni Randolf a tawagan dagiti gagayyemna iti pagkonbensionan tapno ibagana nga isudanton ti mangala iti premiona. Ngem awan ti nakarawana a selpon iti bulsa ti pantalonna. Uray ti petakana, awan. Innala la ketdi dagiti dina am-ammo a kabusor.

Iti umuna a gundaway, nakarikna ni Randolf iti kinaawan ti gawayna. Ti makadakes, kayariganna ti makidindinnisnog iti anniniwan iti kasipngetan!

Binassawanganna ti bagina gapu iti kinaliwayna. Apay a saan a simmiplot iti panunotna nga adda mangsurot ken ni Margret iti panagsublina iti otel? Posible a daytoy met laeng ti nangsurot kadakuada agingga iti Carylle Hotel a nagpaknianda kalpasan a naggapuda iti Nikolai Inn.

Ngem asino? Ti nabaneg a lalaki a kadua ni Marco?

Ket ni Marco? Ania ti pudpudno a kinatao ni Marco?

Posible a da Marco ti simrek iti kuarto ni Margret. Nakitana ida a naggapu iti otel, saan kadi? Saanen a nairanrana ti kaaddada iti otel.

Ngem naamil ni Randolf ti bibigna idi immapay iti panunotna ti nadakamat ni Margret nga idi inlukatna ti ridaw idi aguni ti fire alarm, nakitana ti likudan ti nabaneg a lalaki a timmaray a nagpababa iti agdan. Awan ti nadakamat ni Margret a bag nga iggem ti nabaneg a lalaki.

Kasta met a kapkapnekanna nga awan ti iggem da Marco a bag idi kaduana ti nabaneg a lalaki a rimmuar iti otel.

Nagkusipet ni Randolf. Kayariganna ti agar-arikap iti kasipngetan iti panagsasanggala dagiti pasamak.

Inkallatik ti panunotna: saan ngata a sabali a tao ti nangserrek iti kuarto ni Margret ken nangtakaw iti bagna?

Posible a daytoy met laeng ti nangbuong iti sarming ti fire alarm box tapno agkakaribuso dagiti kustomer iti otel ket nakisurot kadakuada iti itatakiasda iti otel.

Kasta met a posible nga adda sabali a kadua daytoy a nagbati iti ruar a para wanawan tapno siputanna dagiti rummuar-sumrek iti otel. Daytoy ti nangsurot kadakuada idi rimmuarda iti otel sada napan iti Carylle Hotel.

Ngem asino dagitoy?

Umanges-anges ni Randolf a nagsubli iti kama. Imbaltogna lattan ti bagina idinto a napungotna ti buokna.

Ania daytoy a nasnastrekna?

Pagammuan, napabaringkuas idi adda naggilap iti panunotna. Ti surat! Saan ngata a ti surat ti puntiria dagiti simrek iti kuarto ni Margret iti otel?

Nadakamat ni Margret a napanna intunton ti surat ngem saanna a naited ta saan kano nga agnaed iti dayta nga adres ti tao a nakaisangratan ti surat!

Nagkuretret ti muging ni Randolf. No ti surat ti puntiriada, ania ti linaonna tapno paginteresanda?

Manen, limteng iti panunotna dagiti nangegna a boses iti kasipngetan.

“Positibo ti isasangpet dagiti martilio?”

“Wen.”

“Ania a lugar ken petsa?”

“Ammomin nga idiay Kalayaan ti pakaisangladanda. Ti laengen petsa ti dimi sigurado. Dayta ti dukduktalen ti assetmi iti uneg.”

“Masapul a maammuanyo iti kabiitan a tiempo. No saan, dakkel a desgrasia!”

Immuneg ti kuretret iti muging ni Randolf bayat ti panangmulmolna daytoy a simmiplot iti panunotna.

Ania ti koneksion dagiti sumangpet a martilio iti pannakaitalaw ni Margret?

(Adda tuloyna)