Uppat nga aldaw, tallo a rabii (Maika-21 a paset)

“Dika agpanggep a makiranget no dimo kayat a patayabek ti bangabangam!” imballaag ti lalaki.

Minulenglengan ni Randolf ti sangaili. Agtawen siguro ti lalaki iti nasurok a treinta. Agtayag iti lima kadapan ken uppat a pulgada, kalkalaingan ti pammagina, panglampongen.

Apagsurok met a duapulo ti kadua ti lalaki a babai. Nakapantalon iti maong ken nalayak a nakusnaw nga asul ti tisirtna. Kayumanggi. Agkataytayagda iti lalaki.

“Nakariingka gayamen,” immisem ti babai ket nagparang ti saway a kallidna.

“Asinokayo? sinaludsod ni Randolf.

“Saanen a nasken a maammuam ti kinaasinomi,” insungbat ti lalaki.

“Ania ti masapulyo kaniak?”

Kinuna ketdi ti lalaki: “Sika ni Randolf Garcia, taga-Vigan City, 25 ti tawenna, baro, ken freelance writer. Limakayo nga agbabarkada a timmabuno iti Gumil Filipinas National Convention a maang-angay iti Callao, Peñablanca.”

“Kasano nga am-ammodak?” nasdaaw ni Randolf.

“Ipapanmo laengen nga adda kabukbukodanmi a wagas a pagalaan iti impormasion,” kinuna ti lalaki.

“Sinokayo?” inulit ni Randolf ti saludsodna a di nasungbatan ti lalaki.

Nagkinnita ti lalaki ken ti babai.

“Pagsayaatan ti karadkadmo no dika unay naunton,” natbag ti timek ti lalaki.

Nakaem ni Randolf ti bibigna.

“Ammomi met a maysa a Margret Anderson ti kaduam a nagtsek-in ditoy otel,” binagi ti babai ti nagsao. “Segun dagiti delegado a nakapatangmi, naisar-ong ni Miss Anderson iti kombension babaen iti awis ti presidente dagiti mannurat a kameng ti Gumil-Hawaii.”

“Maysa a Dutch national ni Margret… ni Miss Anderson… nga agsursurat iti Women’s World sadiay Netherlands,” kinuna ni Randolf. “Imbaon ti editorna a mangsurat iti kultura, kaugalian ken historia ti Kailokuan.”

“Dayta ti panangiyam-ammona iti bagina,” kinuna ti babai. “Ngem segun iti assetmi sadiay Amsterdam, awan ti publikasion a Women’s World kadagiti newsstands kasta met nga awan ti Margret Anderson nga agsursurat iti uray ania a women’s magazine. Mapagpiaran ti naggapuan ti impormasion ket awan ti duaduami a bogus a mannurat ni Miss Anderson.”

“Diak maawatan ti turongen ti tungtongantayo,” kinuna ni Randolf idinto a tinaldiapanna ti babai a nakatugawen iti abay ti tokador. “Ala, no agpayso man a bugos a mannurat ni Margret… ni Miss Anderson, ania koma ti pakairamramanak?”

Manen, saan a sinungbatan ti lalaki ti saludsod ni Randolf. Kinunana ketdi: “Iti kanayonan nga impormasion a naggapu met laeng iti assetmi, adda sabali a mission ni Miss Anderson iti yaayna iti Cagayan. Suspetsami a front laeng ti konbension tapno makaluban ti pudno a missionna.”

Nagkintayeg ni Randolf. Mission? Ni Margret…. maysa nga espia?

Nagtigerger dagiti ramay ni Randolf a nangapros iti rupana. Adun dagiti nangnangeg ken nabasbasana a kinemmeg ken inyulog dagiti di ammo no soldado wenno kabusor ti turay.

“No kasta… dakayo ti nangitalaw ken ni Margret,” arintigergeren ti bosesna. “Nangipananyo kenkuana?”

“Dika madanagan, nasayaat ti kasasaad ni Miss Anderson iti safehouse,” kinuna ti babai. “Ngem depende iti resulta ti pagpapatangantayo ita.”

Insenias ti lalaki ti panagmasngaad ni Randolf iti suelo. Insalikadna ti paltogna iti siketna ngem nagtalinaed a nakaturong dagiti matana ken ni Randolf.

“Saannakon nga agpalpalikaw,” kinuna ti lalaki. “Ammomi nga adda naipaw-it ken ni Miss Anderson iti panagpa-Ilokosna. Ammomi met nga apanna itunton dayta a paw-it kabayatan ti konbension. Ken ammomi nga adda mangkontak kenkuana sakbay nga ituntonna ti paw-it iti maysa nga adres ditoy siudad.”

Saan a nagtimek ni Randolf. Ngem dagus a simmiplot iti panunotna: ti surat nga impaw-it ti gayyem ti editor ni Margret a maited iti nobia daytoy.

“Sinipsiputanmi ni Miss Anderson apaman a simmangpet iti pagkonbensionan. Iti kamalman ti umuna nga aldaw ti konbension, inasitgannaka ni Miss Anderson bayat a nakatugawka iti bato iti igid ti karayan. Nabayagkayo a nagpatang. Nagkuyogkayo a nagsubli iti pagkonbensionan. Manipud idin, nagbalin a nasinged ti relasionyo a dua.”

“Awan ti dakesna nga agkuyog ti baro ken balasang,” nakuna ni Randolf.

Kinuna ketdi ti lalaki: “Pinasukimatmi ti pakasaritaam iti Vigan City. Awan ti rekordmo iti kapolisan. Pagwadan ti pamilia a naggapuam. Premiado a mannurat iti Iloko. Ngem adda naduktalanmi kadagiti sumagmamano a naipablaak a saritam: suportaram ti yaalsa iti sanguanan dagiti panagkunniber ken panagtakaw iti kaban ti gobierno.”

“Kas mannurat, kalintegak ti mangiyebkas iti anek-ek ti kagimongan,” kinuti ni Randolf ti abagana.

“Ken daytoy, karamanka iti gunglo dagiti aktibista nga agtutubo a nagrali iti Mendiola a nangipukkaw iti yuulog ti Presidente gapu iti alegasion a panagsuitik iti eleksion.”

“Karbengak dayta a kas responsible nga umili. Addatayo iti nademokrataan a gobierno. “Ngem diak masirok ti turongen dagiti saritam.”

“Bagik met ti agsaludsod, Mr. Garcia: Sinoka? Ania ti pudpudno a kinataom?”

Pinagsinnublat a tinaldiapan ni Randolf dagiti sangailina. Nairut ti kaem ti bibig ti lalaki, kasla mannakigubat a nakasagana a mangrugma kenkuana no agkuti iti dakes.

Manen, naulit ti saludsod iti mugingna? Asino dagitoy? Militar? Dina naaluadan ti panagkalantay ti buteng iti sibubukel a kinataona!

(Adda tuloyna)