Uppat nga aldaw, tallo a rabii (Maika-22 a paset)

“Diak magustuan ti turongen daytoy saritaan,” kinuna ni Randolf. “Asinokayo a mangbukitkit iti kinataok? No ka-mengkayo ti militar, saanen a makatao dayta.”

Nagrupanget ti lalaki. Ngem sakbay a makakuti, pinengdan ti babai.

Immanges ti lalaki sana intuloy: “Iti kamalman ti maikadua nga aldaw, nakitami a maysa a lalaki ti immasideg ken ni Miss Anderson iti igid ti karayan. Apagbiit ti panagpatangda ngem adda papel nga inyawat ti lalaki kenkuana. Iti nalimed a panagusisami, naammuanmi a Marco Arriba ti naganna. Nagpalista a maysa a delegado iti kumbension ngem saan nga agat-atendar. Adda laeng iti ig-igid nga agpalpaliiw.”

Saan a naguni ni Randolf. Namrayanna nga inilut ti manggapun agbibineg a sakana gapu iti kabayagdan a nakamasngaad.

“Nakitami met ti yaasidegmo ken ni Miss Anderson sa nagkuyogkayo a simrek iti Callao Caves,” intuloy ti lalaki. “Sinurotnakayo ti maysa a kaduami iti uneg ti kueba. Iti reportna kadakami, adda kano dagiti kanito nga agin-innarasaaskayo a kasla diyo kayat a mangeg ti sabali ti tungtonganyo.”

“Diak ammo a palpaliiwenyo gayam ti tignaymi ken ni Margret…. Miss Anderson,” kinuna ni Randolf.

“Idi damo, ni Marco Arriba ti nangnangruna a suspetsami a kontak ni Miss Anderson. Misterioso ti kinataona. Awan ti nalawag a naalami nga impormasion maipapan kenkuana, no ania a pamilia ti nagtaudanna, no ania ti pagsapulanna ken uray bassit laeng a pakaammuan iti kinataona. Ngem saandan a nagkita pay. Awan metten ti komunikasionda kalpasan ti apagbiit a panagpatangda iti igid ti karayan.”

“Posible nga umanayen ti apagbiit a panagpatangda a kas kontakda,” kinuna ni Randolf.

“Awan ti inyawat ni Miss Anderson ken ni Marco Arriba, siguraduenmi dayta.”

“Ken saan koman a napan intunton ni Miss Anderson ti pawit no naitednan ken ni Marco Arriba,” insalingbat ti babai.

“Ket siak ti nakaibaw-ingan ti suspetsayo agsipud ta siak ti kinalangenlangen ni Margret… ni Miss Anderson… iti napalabas a tallo nga aldaw?” kinuna ni Randolf.

“Exactly,” nagtung-ed ti babai. “Dimo ammo ngem sinipsiputan manipud pay idi napankayo nagpasiar iti Callao Caves. Nakitami no kasano kapardas ti panagsinningedyo ken ni Miss Anderson.”

“Ala, akuek a naasideg ti riknak ken ni Margret… ni Miss Anderson. Ngem saan a siak ti kontakna ken awan ammok mainaig iti paw-it a naited kenkuana nga ituntonna,” impetteng ni Randolf.

“Saankan nga agindidiammo. Sika la ketdi ti kontak ni Miss Anderson. Sika laeng ti naynay a kakuyogna iti pagkonbensionan.”

“Apay a saan nga isu ti pagsaludsodanyo? No adda naipaw-it kenkuana kas alegasionyo, isu laeng ti makaited iti umisu a sungbat.”

“Am-ammom ni Janette Amargo?” kellaat a sinaludsod ti lalaki. “Maysa met laeng a delegado iti konbension.”

Iti panagrikna ni Randolf, kellaat a nagsardeng ti panagpitik ti darikmat. Janette Amargo! Ti nagan ti babai a pangitedan ni Margret iti paw-it!

“Diak am-ammo,” pinatalinaayna ti timekna. “Asino kadi?”
Saan a nagtimek ti lalaki. Ngem nabayag a pinerrengna ni Randolf a kasla padpadasenna a lansaden ti agtartaray iti panunot ni Randolf.

“Nalaingka a mangkalub iti riknam, Mr. Garcia ngem ammok nga agul-ulbodka,” kinunana. “Masigurok nga ammom a ni Janette Amargo ti napusgan a pangiyawatan ni Miss Anderson iti pawit apaman a makasangpet ditoy Cagayan.”

“Ammoyo met gayam,” kinuna ni Randolf, “apay a saan nga isu ti pagsaludsodanyo? Ken apay a saanna a kinontak ni Margret idinto a nagrehistro pay a delegado iti konbension a kas kunayo?”

“Umuna, saan a naikkan iti gundaway nga umasideg ken ni Miss Anderson agsipud ta adu ti umas-assibay kenkuana. Ken addaka nga eskortna. Maikadua, dina ammo ti kinasiasino ti kontak ni Miss Anderson sakbay nga ituntonna ti surat. Maikatlo, amkenna amangan no adda mangsipsiput iti garawna.”

“Kasano nga ammoyo dagitoy? Ken kasano a saan nga aggaammo ti kontak ni Miss Anderson ken ti pangituntonanna iti surat?”

“Kas nasaokon, adda bukodmi a wagas a pagalaan iti impormasion,” kinuna ti lalaki.

Naapiras ni Randolf ti mangrugin agtubo a barbasna idinto a pinadasna a pagsasaipen dagiti pasamak.

Manen, simmiplot iti panunotna dagiti timek iti kasamekan:

“Positibo ti isasangpet dagiti martilio?”

“Wen.”

Ania a lugar ken petsa?”

“Ammomin nga idiay Kalayaan ti pakaisangladanda. Ti laengen petsa ti dimi sigurado. Dayta ti dukduktalen ti assetmi iti uneg.”

“Masapul a maammuanyo iti kabiitan a tiempo. No saan, dakkel a desgrasia!”

“Pakaammuandakanto iti selpon!”

“Saan, delikado! Masapul nga awan ti makaammo iti kaaddak ditoy. Ditayo ammo no adda mangsipsiput kadatayo.”

Naamil ni Randolf ti bibigna. Ni la ketdi Janette Amargo ti babai a kinasinnarak ti datdatlag a lalaki iti kabakiran!

Minatmatanna ti lalaki iti sangona. Isu! nakunana iti bagina. Maibosesanna itan ti lalaki!

Ket ni Janette Amargo? Awan duadua a daytoy babai iti abay ti lalaki!

(Adda tuloyna)