Uppat nga aldaw, tallo a rabii (Maika-23 a paset)

“Rinikisami ni Miss Anderson ngem awan ti naalami iti ikutna. Siguradokami a saanna a naitunton agsipud ta saan a nagparang ti kontakenna. Posible a nagamak ta adda dagiti nangsursurot ken ni Miss Anderson.”

Saan a nagtimek ni Randolf ngem agdakdakiwas ti panunotna. Husto ngarud ti imbaga kenkuana ni Margret a saanna a naitunton ti surat ta saan a nagparang ti babai a pangiyawatanna iti surat. Ken pudno ti suspetsana nga adda nangsursurot ken ni Margret. Ti grupo ni Marco?

Ngem umuk-ukuok iti panunotna ti naisalpika ni Margret a saan nga aggigian iti nailanad iti sobre nga adres ti tao a pangiyawatanna iti paw-it. Panangiyaw-awan kadi daytoy ken ni Margret tapno saan nga agatap nga adda sabali a nakairangtaan iti surat?

Nagkuretret ti muging ni Randolf. Umad-adu dagiti saludsod iti panunotna a dina maikkan iti makapnek a sungbat. Adu unay dagiti sagursor dagiti pasamak tapno mapagsasaipna ken agtagilangada a nalawag ken mapukaw dagiti alindua iti barukongna.

Kapkapnekanna met itan a kumplot dagiti sangailina ti serbidor a nangiyuneg iti pangrabii ken red wine a nalaokan iti pagpaturog. Daytoy met la a grupo ti nangitalaw ken ni Margret ket adda ita iti ikutda ti balasang!

Ngem segun iti lalaki, awan ti surat iti ikut ni Margret idi rinikisada. Yanna ti surat? Masigurona nga insublina ti surat ken ni Margret ket imbolsa met laeng daytoy.

Naamil ni Randolf ti bibigna. Posible met a naalan dagiti sangailina ti surat ket agindidiammo laeng dagitoy nga awan iti ikutda ta kayatda a siguraduen no ania ti ammona mainaig iti paw-it nga iggem ni Margret.

“Masiguromi nga adda pay la ti surat ken ni Miss Anderson agsipud ta saanna a naitunton itay malem,” kinuna ti lalaki. “Isu a sinurotmi iti panagsublina iti otel.”

“Sika ti nakitami a kinasinnarakna iti labes ti Nikolai Hotel,” intuloy ti babai.

“Tinawagannaka la ketdi. Sika pay ti kaduana a timmakias iti otel idi naguni ti fire alarm sakayo nagtsek-in ditoy otel. Sika la ketdi ti nangitalkanna iti paw-it agsipud ta awan ti nasarakanmi iti ikutna,” kinuna ti lalaki.

“Siguradok met itan a dakayo ti nangala iti selpon ken petakak,” kinuna ni Randolf.

“Aniaman dayta a birbirokenyo, ammoyo itan nga awan iti ikutko.”

“Dayta ti kunam,” insalingbat ti babai. “Ngem dakdakkel ti pammatimi a naiyawaten ni Miss Anderson ti surat kenka. Ammom a napeggad ti kaadda ti surat iti ikutmo isu nga inlemmengmo iti disso a sika laeng ti makaammo. Wenno dinadaelmo pay ketdin tapno awanen ti makaammo iti linaonna.”

“Awan kaniak ti surat! Saannak a kontak ni Miss Anderson!” insalingbat ni Randolf.

“Apay a didak patien?”

“Makitak ket di pay simmiplot iti panunotmo ti mabalin a mapasamak ken ni Miss Anderson no talaga nga awan iti ikutmo ti pawit. Agbitbitin ti biag ni Miss Anderson iti surat a naipaw-it kenkuana. No dimi masarakan, saanmonton a makita pay ni Miss Anderson!” kinuna ti lalaki.

Saan a nakatimek ni Randolf. Minulenglenganna ti lalaki.

“Kas nakunayo, napeggad ti surat a matakuatan iti ikutko. Ngarud, no adda man kaniak ti surat, saannak a maag a mangiyawat lattan kadakayo. Dayta ti panigurado nga awan ti dakes a mapagtengmi…. ken ni Miss Anderson.”

Nabayag a saan a nagtimek ti lalaki. Ngem nasiputan ni Randolf ti yiirteng ti rupa daytoy.

Kellaat, inasut ti lalaki ti paltogna. “Tumakderka!” inwagisna ti paltog ken ni Randolf.

Ngem kellaat nga impakurus ti babai ti tammudona iti bibigna. “Adda arimpadek a nagsardeng iti ridaw!” kinunana idinto nga inlitekna ti swits.

Nasallukoban ti siled iti sipnget.

“Dika agkuti! kinuna ti lalaki. Narikna ni Randolf ti natangken a ngudo ti paltog a naidugsol iti bakrangna.

Bumanugbog ti barukong ni Randolf idinto nga imbakalna ti panagkitana iti ridaw. Nangegna dagiti nakapsut nga arimpadek a nagsardeng manen iti batog ti kuarto. Nainayad a napusipos ti serradura ti ridaw.

Adda tao nga agpanggep a sumrek iti siled!

Nangeddeng ni Randolf. Asinoman dagiti adda iti labes ti ridaw, kabusor man wenno saan, daytoy laengen ti nabati a gundawayna a mangisalakan iti biagna.

Kellaat, nagiriag ni Randolf sa timmakder ken kasla makapungtot a toro a nangdungso iti lalaki. Natuang ti lalaki.

Nagludonda a naggubal iti suelo. Maysa a disnog ti indisso ni Randolf iti subsob ti lalaki a puon ti nagannayan daytoy.

Ngem narikna laengen ni Randolf ti natangken a banag a nagdisso iti ulona. Naarinuknok iti suelo.

Naibuang ti ridaw. Iti nakadalebanna, nakitana ti dua nga anniniwan a nangisuyo iti bagida iti uneg ti kuarto.

Nangegna ti panaganikki ti babai ken ti pannakaibalandrana iti dekutson a kama iti sakaananna.
Nagikkis ti sangailina a lalaki a sinaruno dagiti kanabtuog.

Madamdama, ulimek…. makatitileng nga ulimek.

Dayta laengen ti naudi a malagipna.

(Adda tuloyna)