Sarita: Uppat nga aldaw, tallo a rabii (Maika-24 a paset) | Tawid News Magazine - Weekly Ilocos News 📰

Uppat nga aldaw, tallo a rabii (Maika-24 a paset)

Ti nakusnaw a berde a bubeda ti pangipeten a kuarto ti naitangkarang kenkuana idi imulagat ni Randolf dagiti matana. Bimmangon ket kasla agkakapsut a nagsadag iti uluanan ti kayo a katre a naparabawan iti kutson. Medio nadagsen ti ulona. Inarikapna ti dunorna. Adda pay la apagapaman nga ut-ot ti dunorna iti ulona gapuanan ti pannakapalekna iti paltog. Naimbag ta padamgis laeng ti pannakapalekna.

Ospital kadi ti yanna? Ngem yan dagiti nars? Apay nga awan ti mangbanbantay kenkuana? Kasano a nakadanon ditoy? Ngem awan ti maarikapna a sungbat. Ti ketdi nalamuyot nga ungor ti bentilador ti mangegna.

Nagsasaruno dagiti saludsod a dimmamgis iti mugingna. Asino dagiti simrek ken nakaranget dagiti sangailina iti otel? Asinoda man, kapkapnekanna a sabali a grupo dagitoy. Ken kaaliado la ketdi ta naagasan ti sugatna.

Impalawlawna ti panagkitana ket nagsaltek dagiti matana iti kayo a ridaw ti kuarto a nagtagisarming ti akinngato a kaguduana. Adda nakusnaw a lawag iti ruar a pattapattana nga agtaud iti bombilia. Nangegna ti nakapsut a daranudor manipud iti kaparanget ti kuarto a posible nga aggapu iti agan-andar nga electric fan.

Iti ngatuen ti ulona, depdeppaan ti bugbugtong a nagtagirehas a tawa a nakurtinaan iti natangken a berde a lupot. Adda apagapaman a nakusnaw a dayas ti lawag nga aggapu iti ruar.

Timmakder ni Randolf ket siinayad nga immasideg iti ridaw sana sinukimat ti serradura. Husto ti pattapattana, nakakandado ti ridaw iti ruar. Sigurado nga adda guardia iti abay ti ridaw.

Naamil ni Randolf ti bibigna. Maysa la ketdi a safehouse ti nangipananda kenkuana. Ngem asino dagiti nangitalaw kenkuana? Kameng ti militar? Dagiti laeng soldado wenno polis ti adda madadaan a safehouse a pangipaknianda iti kautibuenda.

Adda la ketdi gapuna no apay nga impaknida iti safehouse, saan nga iti ospital, nakuna ni Randolf iti nakemna. Kayatda nga ilimed ti pannakakautibona.

Kellaat a nalagipna ni Margret. Ania ngatan ti napasamak ni Margret? Nangipaknianda kenkuana?

Pinadas ni Randolf a pagsasaipen dagiti napasamak manipud idi inawagan ni Margret iti text nga agkitada iti Nikolai Inn. Nupay adda pay dagiti dina mapagsusurot, medio mangrugin nga agtagilanga dagiti pasamak.

Kapkapnekanna itan nga adda napateg a linaon ti surat a naipakumit ken ni Margret nga ituntonna iti gayyem a babai ti gayyem ti editorna sadiay Amsterdam.

Masigurona metten nga adda koneksion ti surat iti maisanglad a martilio, kas nangegna a nagpatangan ti babai ken ti lalaki iti kasamekan iti igid ti karayan.

Adda sumangpet a martilio! Code name laeng ti martilio. Napateg a kargamento la ketdi ti kayat a sawen ti datdatlag a lalaki!

Ngem ania a kargamento? Droga? Armas?

Kinuna ti babai nga ammodan ti lugar a pakaisangladan ti martilio wenno kargamento. Iti Kalayaan. Nalawag a maisanglad ti kargamento iti Cagayan. Ngem sadino iti Cagayan?

Nadakamat pay ti babai nga iyur-urayda laengen a maammuan ti petsa a pannakaisanglad dagiti kargamento.

Ad-addan nga immuneg ti kuretret iti muging ni Randolf. Linaon la ketdi ti surat ti impormasion mainaig iti lugar iti Cagayan ken petsa a pannakaisanglad dagiti kargamento.

Saan ngarud a nakakaskasdaaw nga adda dua a grupo nga interesado a mangammo iti linaon ti surat a naipaw-it ken ni Margret. Asinoman kadakuada a makauna a makaammo iti petsa ken pakaisangladan dagiti kargamento ti makatagikua kadagitoy.

Ngem ti saludsod: naipasakbay kadi ken ni Margret ti kinapateg ti surat? Wenno….

Nagkusipet ni Randolf. No ammo ni Margret ti napateg a linaon ti surat, kumplot ngarud ti grupo sadiay Amsterdam a nangibaon kenkuana iti Cagayan. Ammona ngarud ti pakaipasungalngalanna a peggad no adda sabali a grupo nga aginteres iti linaon ti surat!

Kellaat, limteng iti panunotna ti imbalikas ti sangailina a lalaki iti otel: “…Awan ti publikasion a Women’s World kadagiti newsstand kasta met nga awan ti Margret Anderson nga agsursurat iti uray ania a women’s magazine. Mapagpiaran ti naggapuan ti impormasion ket awan ti duaduami a bogus a mannurat ni Miss Anderson.”

Immanges ni Randolf iti nauneg. Nupay yik-ikkis ti riknana a saan nga husto ti imbalikas ti lalaki, patpatalgedan dagiti pasamak nga adda kinaagpayso ti alegasion daytoy nga aglemlemmeng laeng ni Margret iti kinatao ti maysa a mannurat iti magasin dagiti babbai.

Ni Margret, manglimlimo a mannurat?

Asinoka kadi, Margret Anderson? nayesngaw ni Randolf.

Nagalingag idi makangeg iti ungor dagiti lugan a naggapu iti amianan sa nagsardeng iti sanguanan ti kuartona.

Nangegna dagiti arimpadek a nagsardeng iti ridaw sa ti pannakalettat ti kandado ken panagranitrit ti nailukat a ridaw.

Naikuleng ni Randolf, kasla dina patien ti nataldiapanna a nakauniporme a lalaki nga immuneg iti kuarto.

Ni Marco Arriba!

Ti babai a simmaruno a simrek ti nakaituonan itan ti imatangna.

“Margret…!” nayesngawna.

(Maigibusto)