Sarita: Uppat nga aldaw, tallo a rabii (Maikalima a paset) | Tawid News Magazine - Weekly Ilocos News 📰

Uppat nga aldaw, tallo a rabii (Maikalima a paset)

Samo laeng gayam marikna ti kinapateg ti maysa a parsua inton napukawmon iti biagmo, nakunkuna idi ni Randolf iti bagina.

Namrayan ni Randolf a kinuti ti abagana. Paseten ti kalman ni Namnama. Uray ania ti aramidenna, saannan a maisubli pay ti napalabas.

Wen, masapul metten nga umaddang nga agpasango. Move on, Randolf, nakunana iti unegna. Adda biag kalpasan ni Namnama.

Naputed ti panagpapatang da Randolf idi lumabas ti nalabaga a kotse. Dimsaag ni Margie, ti Gumiliana a naayat a kumuykuyog kadagiti mutia a taga-California, a sinaruno dagiti lima a babbalasang. Naggilap dagiti kamera idi ukkoran ni Arthur dagiti babbalasang iti kuentas a sabong.

“Agalibtakka,” inkidday ni Mang Hermie, mannaniw a taga-Capangpangan. “Gundawaymo daytoyen a mangyalat iti balikbayan.”

Simmurot ni Randolf kadagiti padana a mannurat nga immasideg. Linamanona ni Margie. Limmukmeg. Naisem a kas iti dati.

“Kadagaam ‘diay Hawaii, Manang,” nakuna ni Randolf.

“Wen ngarud,” insungbat ni Margie. Ginuyodna ni Randolf ket inyam-ammona kadagiti kakaduana. Evelyn ti nagan ti Miss Gumil-California, Rose ti Miss Badoc, Lily ti Miss Batac ken Janet ti Miss Bauang.

“Daytoy ni Randolf Garcia, one of the best writers in the vernacular at present,” kinuna ni Margie.

“Mabasbasami dagiti saritam, Manong,” kinuna ni Evelyn. “Nagbabagasda. Adu rigatmi a mangibuksil.”

Naiwaragawag ti panangrugi ti programa. Nagpadispensar da Margie ket simbrekda iti pagkonbensionan. Inayaban ida ni Arthur nga agtugaw iti sango. Nakatugaw metten ni Manang Lucing ken Margret iti abay ni Mang Joe.

Adda bakante a tugaw iti abay ni Manang Eden, katugawna ni Manang Aida, propesora iti Literatura iti Unibersidad ti Pilipinas.

“Aida, ni Randolf, ti grand prize winner iti Gumil-California Short Story Writing Contest,” pinangiyam-ammo ni Manang Eden.

“Kunak no lumakaykan,” kinuna ni Manang Aida. “Agtutuboka pay met la gayam. Awan, malastrip latta ngarud datao.” Agtawenen iti 40 ni Manang Aida. Nupay kasta, adayo nga ub-ubing ti langana. Naisem ngamin ken mannakiangaw.

“Di  tukmaam lattan ni Randolf,” indurog ni Manang Eden.

“Iti dayta a langa, adda la ketdin nanggalut kenkuana,” naggarikgik ni Manang Aida.

“Awan pay. Agbirbirok pay datao, Manang,” kinuna ni Randolf.

“Kasta? Agsinnukatta man iti tugaw, Eden, ta agkaabaykami ken Randolf. Who knows, baka agkagasatkami. Bulsek ni ayat, saan kadi?”

“Dimo unay ipigsa ket datayon ti sentro ti atension,” inyanawa ni Manang Eden a puon ti nagkakatawaanda.

Nagbitla ti gobernador a naawis a naisangayan a sangaili. Dinayawna dagiti mannurat nga Ilokano gapu iti nasinged a panaglalangenda a narigat a makita kadagiti mannurat a Tagalog ken Bisaya.

Dinakamat ti gobernador nga adu dagiti maipagtangsit a buya iti Cagayan ket indagadagna ti panangisurat dagiti mannurat tapno maammuan dagiti sabsabali a lumugar.

“Dakayo ti rangtaymi kadagiti di pay nakadap-aw iti lugarmi tapno maduktalanda ti kaadda daytoy a lugarmi a maibilang a paraiso gapu kadagiti maipagtangsit a natural a buyana,” kinuna ti gobernador.

Nagsarita met ni Margret. Inyam-ammona ti bagina iti tallaong, no kasano a nakadanon iti konbension.

“Agyamanak ken ni Manang Pacing iti panangitedna iti gundaway kaniak a makadakulap dagiti maraem a mannurat nga Ilokano,” kinuna ni Margret nga umis-isem a nangipalawlaw ti panagkitana. “Makitak, nupay ita laeng a makaam-ammokayo, ti kinamanagsangailiyo, ti awan panaginkukuna a pannakilangenyo.

“Panagriknak, naidumduma ni mannurat nga Ilokano. No ania ti pakaidumaanna kadagiti sabali a puli, dayta ti kayatko a takuaten bayat ti panagintekko iti pagilianyo,” inggibusna idinto a nagsaltek ti panagkitana ken ni Randolf.

Iti panagsabat dagiti matada, di ammo ni Randolf no apay a nagtibbayo ti barukongna.

Manen, simngay ti naisalsalumina a rikna iti let-angna. Madi daytoyen, nakunana iti unegna. Agayat kadin wenno napigsa ti pisikal a pangawis ni Margret?”

(Maituloyto)