Sarita: Uppat nga aldaw, tallo a rabii (Maika-11 a paset) | Tawid News Magazine - Weekly Ilocos News 📰

Uppat nga aldaw, tallo a rabii (Maika-11 a paset)

Nagsabat dagiti matada. Manen, narikna ni Randolf ti kasla adda mapuypuyupoyan a beggang iti kinataona.

Nagkatawa ni Margret idinto nga inwang-itna ti buokna.

Tiliwen koma ni Randolf ti balasang ngem nakangngegda iti anabaab manipud iti amianan. Sumagmamano a turista ti umas-asideg. Agkaragilap dagiti kamerada.

“Intan, baka nangrugin ti programa,” kinuna ni Margret. “Baliwantanto ti agpasiar tapno ad-adu pay ti serkenta a kueba. Ken wen gayam, di met maipresentar ita a malem dagiti kandidata para Miss Gumil-Filipinas?”

“Wen. Kalpasanna, mabilang ti kuartada. Maangay ti koronasion ita a rabii,” insungbat ni Randolf.

“Tinawen kadi nga adda mapili a mutia ti Gumil?”

“Nagbalinen a maysa kadagiti kangrunaan nga aktibidad iti kombension. Iti kallabes, beauty and brains ti salip. Ngem ita, panggep ti gunglo ti makaullom iti kuarta a pagbangon iti balay ti Gumil a maipatakder iti Suso Beach, Sta. Maria, Ilocos Sur, isu a ti kadakkelan ti maitapog a kuarta ti mangabak a Miss Gumil Filipinas.”

“Balay ti Gumil…., napintas dayta a panggep. Sapay koma ta agtagilanga a saan ketdi nga arapaap laeng.”

Nagtung-ed ni Randolf. Kinapudnona, inkissiim ni Mang Diony, editor ti Agsapa Magazine, ti panggepna nga agkandidato a para presidente a kaduana ni Arthur a bise. Iti panagkitana, agmata dayta a panggep ti gunglo a maaddaan iti balay a pagdagusan iti Suso Beach Resort no isuda ti mapili a mangidaulo.

Immanges iti nauneg ni Randolf idi rummuarda iti kueba. Panagriknana, nagsublida iti agdama manipud iti napalabas.

Nagkiriring ti selpon ni Margret. Inruar ti balasang ti selponna sana kinita ti timmawag.

“Apagbiit laeng, ti editorko ti tumawtawag,” kinunana sa immadayo.

Apagbiit ti pannakipatang ni Margret iti selpon. Nagsubli met la a dagus iti yanna.

“Monmonitoren ti editormi no sadino ti yanko,” kinuna ti balasang.
Nagtung-ed ni Randolf idinto a tinangad pay naminsan ti naggapuanda. Kellaat, naipigket ti matana iti lalaki nga inyula ti ridaw ti kueba. Ti lalaki a nakitana a kinapatang ni Margret iti igid ti karayan!

Apagaman laeng ti panangtaliaw ti lalaki kadakuada sa dagdagus nga immulog iti agdan.

Nagkuretret ti muging ni Randolf. Napan met nagpasiar ni Marco iti kueba kas kadakuada? Saan ngata nalimed a sinursurot daytoy ida?

“Saan kadi a daytoy ti agdan nga umulian nga agtunged iti view deck?” sinaludsod ni Margret ket napukaw ti panagpampanunot ni Randolf. Intudo ti balasang ti agdan a naisapideng iti nagrungarong a puon ti balite.

“Umulita ngarud. Uray siak, kayatko met a buyaen ti pakabuklan ti Peñablanca manipud iti bantay,” kinuna ni Randolf.

Nagpauna ni Margret. Naaddaan iti gundaway ni Randolf a nagpapas a nangbuya iti pakabuklan ti balasang nga induyayyat ti pangipeten a maong a pantalon a naasmangan iti krema a t-shirt. Kasla dina pay la patien a naarakupna dayta a pammagi.

Nagsammaked ni Randolf iti kayo a pasamano ti view deck sana impalawlaw ti panagkitana. Dina mailadawan ti kinadaeg ti nakaparsuaan a daydayasen ti agpakadan nga init.

“My God, mabsog dagiti matak kadagiti napintas a buya ditoy!” nayesngaw ni Margret idinto nga inlagana ti ramayna iti ramay ni Randolf.

Tinaliaw ni Randolf ti balasang a nakaturong itan dagiti matana iti kasla agar-arasaas a karayan iti baba. Kasla adda babassit a koriente nga agkarayam manipud iti ramay ni Margret nga in-inut a manglapunos iti kinataona..

“This place makes me feel romantic,” kinuna ti balasang ket narikna ni Randolf ti yiirut ti petpet daytoy iti dakulapna.

Sakbay a makakuti ni Randolf, dua nga agek ti immaldit ti balasang iti bibigna. “Addayta, adda payen bunosmo iti pannakaabakko iti lumba,” kinunana sa immisem iti nakasamsam-it.

Iti pangsublida iti baba, nasabat da Randolf da Rey, Robert ken Freddie iti sakaanan ti agdan.

“Ne, nadaraskayo met a nagpasiar,” kinuna ni Rey.

“Nalipatak ti flashlight,” kinuna ni Randolf. “Napeggad ti agdakiwas iti kasipngetan ta adda dagiti derraas a pakaikaruskosan. Baliwanminto laengen ti agsubli iti kueba tapno ad-adu pay ti takuatenmi.”

“Isurom, o imnas nga ingget lapsat, ti ridaw ti uray kaunegan a kueba, ta diak sanudan a sukisoken ti lansadna,” inyayug ni Rey.

“Addakayo manen a sutil,” kinuna ni Randolf.

Pagammuan, linikaw ni Robert ni Randolf sana minatmatan.

“Apay a kasta ti panagkitam kaniak?” masmasdaaw a sinaludsod ni Randolf.

“Aha, adda lipistik iti babaen ti bibigmo!” kinuna ni Robert.

Awan iti panunotna nga impalabas ni Randolf ti imana iti bibigna. Naladawen idi naamiris ni Randolf a namaysaan ni Robert.

Naggarakgak dagiti tallo a sutil. Nairayo ni Margret a nagkatawa.

Naglimog ti bangag, sintunado ken nasinggit a timek dagiti tallo iti panangkantada iti “Pamulinawen” bayat ti yuulida iti agdan.

“Nabukingkan,” umis-isem ni Margret a nangtaldiap ken ni Randolf.

“Wen, ngarud,” nakudkod ni Randolf ti ulona. Saanto la ketdi a sardengan dagiti pagayamna a sutilen mainaig iti panaginnagekda ken ni Margret.

Naglantip dagiti matada. Awan ti nagaon kadagiti bibigda ngem rinibu a balikas ti intalukatik dagiti matada.

(Adda tuloyna)