Sarita: Uppat nga aldaw, tallo a rabii | Tawid News Magazine - Weekly Ilocos News 📰

Uppat nga aldaw, tallo a rabii

ADDA PAY LA da Randolf iti sungaban ti dalan a kumamang iti pakaangayan ti taripnong, simmabaten ni Arthur Etrata, presidente ti Gumil-Cagayan. Panayagen ket nupay agtawenen iti nasurok nga uppat a pulo, nabaked pay ti pammagina. Nangato ti saad ni Arthur iti maysa nga ahensia ti gobierno ngem aktibo iti gunglo dagiti mannurat. Idi iti Ilocos Sur pay ti pakaang-angayan ti kumbension nasional, sangadyipanda nga umay makitaripnong. Damoda ita ti agsangaili iti nasional a kumbension.

“Dumanonkayo, brods,” nabara ti pannakidakulapna kada Randolf, Rey, Freddie, ken Robert.

“Iyam-ammomto man ni Randolf kadagiti tsikas ditoy bareng mariing ti matmaturog a riknana, lakay,” kinuna ni Rey.

“Dikayo madanagan, aduda a mangur-uray iti itatabuno ni Randolf,” insungbat ni Arthur. “Pakaidayawanmi ditoy Cagayan no adda makaawis iti rikna ti numero uno a mannurat iti Amianan.”

“Dayta, nangegmo ti kinuna ni Apo Presidente,” kinuna ni Freddie. “Agawaam, lakay, barbareng malanitan manen ti kumriiten a boksitko a nabayagen a di nakaraman iti karne nga insawsaw iti dara.”

“La, bagitayonton ti saggaysa a kalding kas saguttayo no dumteng dayta naindaklan nga aldaw,” kinuna ni Rey.

“Tagtagarikayo man,” kinuna ni Randolf. “Uray sadino ti yanyo, ikuykuyogyo ti kinasutilyo.”

Nagkakatawada amin.

“Kumusta ni Nick, Manong?” inamad ni Randolf ken ni Arthur bayat ti panagturongda iti convention hall.  Inaudian a kabsat ni Arthur ni Nick.

“Pinanawak a matmaturog idiay balay,” kinuna ni Arthur. “Napalaluanna siguro ti imminom idi rabii bayat ti panagdekorarda iti pagkumbensionan. Ngem sigurado a sika ti umuna a birokenna no maammuanna nga addakan.”

Nasinged a pagayam ni Randolf ni Nick. Kaarigda ti agkabsat. Isuda ti sangkakuyogan no adda dagiti seminar wenno taripnong a dar-ayanda. Idiay Suso Beach, patnaganda ti agtungtong iti igid ti baybay bayat ti panagpasag dagiti allon iti kadaratan. No dadduma, kuna pay dagiti sutil a kamannuratanda a maysa kadakuada ti bakla.

“Inkayo ngaruden agparehistron sadakayto itulod iti paggiananyo,” kinuna ni Arthur ket intudona ti convention hall. “Madamdama pay ti panammigattayo.”

Tallo a babbalasang ti nadatnganda nga agparehistro iti napagsisilpo a tallo a lamisaan. Kamengda amin ti Gumil-Cagayan.

“Sika gayam ti nalatak a Randolf Garcia a nangiyalat iti umuna a gunggona iti pasalip ti sarita ti Gumil-Cagayan iti daytoy a tawen,” impallilit ti kalapsatanda idi mabasana ti inkur-it ni Randolf iti registration form.

“Magustuanmi a basbasaen dagiti saritam, Manong,” kinuna ti agnagan Angel. “Kunami no lakaykan ngem agkakataebantayo pay met la gayam.”

“Isu, awan sabali, ading,” insalingbat ni Robert. “The one and only married in the group. Dakam’ la ken ni Freddie ti nakakaasi piman a di pay taliawen uray daytay kalangakang a di pay nabisibisan iti apagkanito nga arbis iti kalgaw.”

“Oy, bistadokan, lakay,” kinuna ni Rey ken ni Robert. “Naipablaak iti Anaraar a tallon ti putotmo.”

“Kunkunak met la ketdi daydiay,” nakudkod ni Robert ti ulona, “barbareng adda dumawi.”

“Kasano nga adda dumawi, Manong, ket awan met ti lawinmo,” umis-isem a kinuna ti agnagan iti Mildred.

Umis-isem laeng ni Randolf a dimngeg kadagiti sutil a kakaduana. Kasta kaparato dagiti gagayyemna. Ngem saanda ketdi a kas kadagiti dadduma nga arogante ken inangin ti tuktokda.

Binay-anna nga iyaspili ti balasang ti identification card a nakailanadan ti naganna. Nasay-opna ti apagapaman nga ayamuom ti bangbanglo ti balasang. Kasla simmanikar ti riknana a nautoyan iti dandani nagpatnag a panagbiaheda.

“Kuyogem man ida, Angel, a mapan iti kuartoda,” tinung-edan ni Mildred ti kaabayna a babai.

“Pangipanam kadakami, iti paraiso a pagay-ayuyangan dagiti anghel a kas kenka kalapsat?” inamad ni Freddie.

“Iti cottage, Manong,” inyisem ni Angel. “Ngem awan ti anghel sadiay, pasig a toro.”

Simmang-atda iti aspaltado a dalan a kumamang iti pasdek nga adda iti abagatan ti convention hall. Immulida iti maikadua a kadsaaran. Nagsardeng ni Angel iti maikadua a kuarto a matuparda.

“Ditoy ti paggiananyo, Manong,” kinunana. “Makaammokayo koman a mangpunno kadagiti pagkuranganna.”

“No problem, sweetie pie,” kinuna ni Rey. “Uray ania ti itedmo kadakami a paggiananmi, ibilangmi lattan a paraiso.”

“Paraiso dagiti Adan nga awanan iti Eba,” innayon ni Robert.

“Pilio gayam dagiti taga-Ilocos Sur,” inkatawa ni Angel.

Napataliawda iti sungaban idi makangegda iti anabaab.

Nailasin ni Randolf ni Manang Pacing Arenas, ti presidente ti Gumil-Hawaii. Uppat a babbai ti kaduana a simmangpet.

Ti kaabay ni Manang Pacing ti nakaituonan ti mata ni Randolf. Pinalabsanna ti kasla natubtubay a pammagi ti balasang nga ad-adda a pinagminar ti nakipet a puraw a tisirtna a naisakibot iti kimmepkep a maong a pantalonna. Iti pattapattana, kataebanna ti balasang.  Agtawenen ni Randolf iti duapulo ket lima.

Nagkuretret ti muging ni Randolf idinto a minatmatanna ti olandes a buok ti balasang nga umis-isem bayat ti panangiwarwarasna ti panagkitana iti aglawlaw. Amerikana? nasaludsodna iti bagina.

Nagsabat ti panagkitada iti balasang. Kellaat, simmangbay ti karkarna a rikna ken ni Randolf!

(Maituloyto)