Uram iti opisina ti SSS, nagtaud iti rebentador

VIGAN CITY – Babaen ti alisto a panagresponde dagiti bumbero ti Bureau of Fire Protection, saan a nakapagtagamtam ti uram iti maysa a pasdek-negosio ditoy siudad apagsurok laeng a tallupulo minutos kalpasan ti isasangbay ti baro a tawen.

Idi agarup 12:35 a.m. kalpasan ti isasangbay ti Enero 1, 2015, nakaawat ti police station ditoy siudad iti tawag iti telepono manipud iti maysa nga umili a maur-uram ti Mike’s building, kukua ni Michael Chan, naasawaan, ken residente iti Barangay IV, Vigan City, partikular ti opisina ti Social Security System a masarakan iti Sikatuna Street, Barangay 1, Vigan City.

Nadepdep ti apuy idi agarup 1:10 a.m. babaen dagiti nagresponde a bumbero ti BFP, Vigan.
Iti inisial a panagimbestiga dagiti otoridad, mapapati a nagtaud ti uram iti naipuruak a rebentador a nagdisso iti pempen a pappapel iti nasao nga opisina.

Immuna ngem daytoy, naireport idi agarup 8:30 ti sardam ti Disiembre 31 a nauram ti Lernel Building, partikular iti auto supply ken furniture a masarakan iti sango ti tiendaan publiko, Barangay Poblacion Este, Sta. Cruz, Ilocos Sur.

Segun iti report, idi agarup 8:27 p.m. iti nadakamat a petsa, kellaat lattan a nakita ti apuy iti maikapat a kadsaaran ti Lernel building a kukua ni Nelson Chua y Pajemola, 34, naasawaan, ken residente iti Barangay Gabor Norte, Sta. Cruz, Ilocos Sur.

Nupay kasta, babaen ti panagtinnulong dagiti bumbero ti Sta. Cruz ken ti immarayat a bumbero manipud iti Sta. Lucia, nadepdep ti apuy idi agarup 9:45 iti dayta met laeng a rabii.

Iti pannakaisurat daytoy, di pay ammo no ania ti nagtaudan ti uram ken no mano ti balor ti nadadael a sanikua gapu iti uram.#