Uray dagiti ubbing, magustuanda ti malunggay ice cream ti San Ildefonso, Ilocos Sur (Maudi a paset)

Iti napalabas a panagpiesta ti ilida itay Marso, pinagsubli ni Mayor Purisima ni Willy Pamo iti opisinana tapno adda manen sabali nga ipaaramidna. Itoy a gundaway, dinawat ni Mayor Purisima ti panagaramid manen ni Willy iti sorbetes manipud iti sabali a nateng, saan laengen a malunggay ice cream. Nasurok sangapulo a raman (flavors) ti kiniddaw ti mayor nga aramidenda para iti pannakairugin ti trademark a BUNGRO ICE CREAM. Itoy a gundaway, wen a dagus ti insungbat ni Willy, saan a gapu ta sukatan ti mayor ti gastosna no di ket addan panagtalekna iti bagina a kabaelanna ti agaramid iti sorbetes manipud iti sabali a natnateng.

 

Karaman iti signature flavors ti sorbetes a marunggay a nabaknang iti iodine, karabasa a napno iti bitamina A, pinipig, red bell pepper-keso, mungo, peanut butter, kapeng matapang ken balikutsa; seasonal flavors ti manggang hilaw, manggang hinog, kaimito, melon, sampalok, chico, langka, guayabano, pinia ken papaya-kalamansi; ken karaman met iti therapeutic flavors ti ampalaya para kadagiti diabetic, roasted garlic para kadagiti agsagsagaba iti hypertension, ginger-honey  para iti sakit ti ulo, apple-guava a nabaknang iti bitamina C,  ken green tea a pagdalus iti uneg. Nagusarda pay iti artificial nga asukar a maaw-awagan iti “splenda” kadagiti therapeutic flavors tapno makan uray dagiti nangato ti blood sugarna.

Impasigurado ti mayor a magustuan dagiti tattao dagiti aramidda a sorbetes. Kinunana  nga adda sigurado a paglakuanda ta adda tay kunkunada a curiosity market, no sadino a maawis ti imatang dagiti makadamag iti kaadda iti baro nga ice cream ket kayatda a ramanan.

“Naisangsangayan ti produktomi ta naaramid dagitoy nga usar dagiti natural a sangkap ta addada la iti arubayan. Ngarud, saan a nangina ken nadarasda a biroken,” kinuna ti mayor.

Apay a napilida ti trademark a BUNGRO ICE CREAM? Inlawlawag ti mayor nga iti ngamin Barangay Bungro iti ilida a San Ildefonso ti pakasarakan iti kaaduan nga agar-aramid iti sorbetes ket rumbeng ngarud a ti nagan ti barangay ti mausar.

Kinuna pay ti mayor a rugianda metten a papigsaen ti merkado daytoy a produktoda tapno umadu ti pamilia a mabenepisiaran. Ad-adu ti magapuanan no ti sibubukel a barangay ti mangipromot, inyunay-unayna.

Iyaw-awis ti mayor ti panangpadas saan la a dagiti taga-Ilocos Sur no di uray dagiti turista kadagiti produktoda nga ice cream. Kinunana a naimas nga ipasango dagiti sorbetesda kadagiti okasion kas iti birthday, buniag, children’s party ken dadduma pay. Kiniddaw payen ni Mayor Purisima ti tulong ti Department of Trade and Industry (DTI) ken Department of Science and Technology  (DOST) iti probinsia tapno tumulongda iti packaging, no kasano a maaddaan iti babassit a pagkargaan, ken no kasano a mapadaras pay ti produksion dagitoy a produktoda.

Inkari metten ni Gob. Savellano ti itutulongna itoy a produkto ti San Ildefonso. Impanamnamana nga iramanna daytoy iti programana a Buy Ilocos Sur Made Products para iti agtultuloy a product development daytoy idinto nga impaganetgetna ti pannakailakoda kadagiti school canteens iti sibubukel a probinsia tapno masigurado ti idadakkel ti negosio a makaited iti adu a pagsapulan kadagiti taga-Ilocos Sur.

Ita a kalgaw,   pumasiartayo iti San Ildefonso, Ilocos Sur  tapno ramanantayo dagiti sorbetes a naaramid manipud iti nateng.#