Banner News: US$4 billion aid, kari ti Japan govt. bayat ti APAD Ilocos launching | Tawid News Magazine - Weekly Ilocos News 📰

US$4 billion aid, kari ti Japan govt. bayat ti APAD Ilocos launching

VIGAN CITY – Tulong nga agdagup iti US$4 billion manipud ti gobierno ti Japan a para ti Pilipinas iti Disaster Risk Reduction ken Post Disaster Build Back Better program.

Dayta ti mensahe ken pammatalged ni Mr. Atsushi Kabayashi, opisial iti Japanese Embassy iti Pilipinas nga imbasa ni Ms. Athea Peñalosa, National Coordinator ti Asia Pacific Alliance for Disaster Management – Philippines (APAD) kabayatan ti pannakayusuat ti Ilocos Regional Platform sadiay Vigan City Trade and Culture Center idi Pebrero 21, 2019.

Imbasa ni Ms. Peñalosa ti mensahe ni Mr. Kabayashi a nangipeksaanna iti panangbigbigna ken panangsuportana ti gannuat nga isaysayangkat ti APAD ken ti gobierno ti Pilipinas, dagiti negosio, ken pribado a sektor ken non-government organizations para ti pannakapadur-as dagiti programa para iti Disaster Risk Reduction ken panangtulong kadagiti biktima kabayatan ti isasangbay dagiti didigra kas dagiti napigsa a bagyo ken layus. Impalagipna a mayanatup la unay ti pannakayusuat ti APAD Ilocos Regional Platform ta iti Kailokuan ti maysa kadagiti nakaro a map-apektaran ti didigra kas ti Bagyo Lawin idi 2016 ken Bagyo Ompong itay 2018.

Impasingkedna a ti gobierno ti Japan kas mayataday iti 2015 Sendai Cooperation Initiative ket madadaan a mangipaay kadagiti non-material assistance kas ti human resources development; material assistance kas kadagiti nangato ti kalidadna nga imprastraktura; ken pannakaitandudo iti global and regional wide cooperation.

“Japan has committed to provide cooperation amounting to four billion US dollars and train 40,000 government and local officials to play a lead role in national efforts for disaster risk reduction and post-disaster Build Back Better initiatives,” kinuna ni Ms. Peñalosa iti panangibasana iti mensahe ni Mr. Kabayashi a nangipasingkedan ti Japanese Official ti suporta ti gobiernoda iti Pilipinas para iti didigra.

Iti met panagsarita ni Ms. Divina Quemi, Chief Executive Officer ti Nueva Segovia Consortium of Cooperatives, napili a lead convenor ti APAD Ilocos Region Platform, impakaammona a nabayagen nga ar-aramiden ti NSCC ti tumultulong kadagiti tattao ken komunidad no panawen ti didigra, ken kayatda nga itultuloy dayta a natan-ok nga aramid babaen ti pannakitimpuyogda iti APAD.

“Helping the people during disasters is not only my personal advocacy, but advocacy of the NSCC, and we intend to continue this noble act,” kinuna ni Ms. Quemi.

Impalagipna ti pakasaritaan ni Noah a nagbangon iti dakkel nga arko a pagyanan dagiti tattao kas panagsagsagana iti nakaro a layus kas panangidariragna ti awisna kadagiti adda iti gobierno, negosio, simbaan ken dadduma pay a sektor a makikaysa iti gannuat nga agsagana para iti isasangbay ti didigra.

Nakikaysa iti pasken dagiti opisial ti APAD Philippines, da SPM Mika Mendoza a nangibagi ken ni Gov. Ryan Singson ken Provincial Government, pannakabagi ni Vigan City Mayor Juan Carlo Medina ti City Government, NSCC, Ilocos Sur Integrated Press ken dadduma pay a media institutions, religious and business sectors ken stakeholders. Nakipagpirmada iti katulagan wenno covenant of support para ti gakat ti APAD Philippines Ilocos Regional platform. Ti APAD Ilocos Regional Platform launching ket maikanemen a rehion iti Pilipinas. Ti APAD ket NGO a nangrugi sadiay Japan ken makikaysa iti gobierno ken pribado a sektor iti pannakaipaay dagiti nagduduma a serbisio para ti disaster risk reduction ken panangsaranay kadagiti biktima kadagiti lugar a narigat wenno saan a madanon ti serbisio ti gobierno