Banner News: Usaren a nasayaat ti R.A. 7171 fund ta saan nga agnanayon a nabuslon – Ex-NTA Administrator | Tawid News Magazine - Weekly Ilocos News 📰

Usaren a nasayaat ti R.A. 7171 fund ta saan nga agnanayon a nabuslon – Ex-NTA Administrator

NARVACAN, Ilocos Sur – Panagusar a nasayaat dagiti local government units kadagiti alokasionda a dakkel a pondo iti Virginia Tobacco Excise Tax Fund kas sagudayen ti Republic Act No. 7171 ta saan nga agnanayon a nabuslon gapu ti kampania kontra panagsigarilio ken pannakaingato ti sin taxes nga in-inut a mangpakapsut ti industria ti tabako.

Dayta ti maysa kadagiti inrakurak ni sigud nga Administrator ti National Tobbaco Administration ken dati a Narvacan Mayor Edgardo Zaragoza kadagiti kameng ti Ilocos Sur Integrated Press kabayatan ti pannakiumanda kenkuana.

Inlawlawagna a dakkel ti bingay ti Provincial Government ken dagiti LGU ta iti Ilocos Sur ti kangrunaan nga agmulmula iti tabako a birhinia. Impakaammona a dimmakkel ti bingay dagiti ili manipud idi awanen ti congressional share dagiti diputado kalpasan nga inkeddeng ti Korte Suprema a mapawilan dagiti kameng ti Kongreso nga agiyimplementar kadagiti proyekto. Impakaammona a dagiti sigud a congressional share ket maiteden kadagiti LGU. Impalgakna a nasurok a P565 million ti kaudian a municipal share ti Narvacan, ken ad-adu pay ti bingay dagiti ili nga ad-adu ti produktona a tabako a birhinia.

Inlawlawagna a binilion dagiti maaw-awat a pondo ti probinsia manipud iti R.A. 7171 fund a no nasayaat laeng ti pannakaaramatda ket naan-anay koman ti panagprogreso dagiti amin nga ili ken siudad iti Ilocos Sur. Inrakurakna nga adda dagiti mapaliiwna proyekto a saan nga umno a nakausaran ti pondo ta saan a naan-anay a mabenepisiaran dagiti mannalon nangruna dagiti agmulmula iti tabako a birhinia.

Impanakkelna a kas Certified Public Accountant a nagturpos iti University of the Philippines ket nasayaat ken nainkalintegan ti pannakausar dagiti amin a pondo ken financial management iti panagserbina kas mayor ti Narvacan ken kas administrator iti NTA, ken awan ti naaw-awatna a notice of suspensions and disallowances manipud iti Commission on Audit, ken awan ti nakaidarumanna a kaso ti graft and corruption.

Impakaammona a kabayatan ti panagtakemda a Zaragoza iti Narvacan ket nasayaat ti panangiyimplementarda kadagiti pondo ti munisipio agraman ti R.A. 7171 fund a naaramat kadagiti pannakakonkreto dagiti farm to market roads, pannakagatang dagiti farm machineries, abono ken bin-i a bukel a maiwaras kadagiti mannalon. Impakaammona pay a maik-ikkan ti insentibo dagiti mannalon nga agmulmula iti tabako – P5 ti kada kilo kadagiti agmula iti Virginia ken P2 ti kada kilo kadagiti agmula iti native – tapno maparegtada nga agmula ket umadu ti produktoda ken dumakkel pay ti alokasionda iti R.A. 7171 fund.

Inlawlawagna a saan a prioridad ti Municipal Government dagiti proyekto nga awan ti naindaklan nga epektona iti biag dagiti mannalon ken umili kas ti pannakabangon ti baro a munisipio ken public market. Impakaammona a no man daanen, napintas ken natibker pay laeng ti munisipioda ken air-conditioned ken nasayaat ti working condition dagiti agtrabtrabaho kadagiti opisina ken siled ti Municipal Hall. Inlawlawagna pay a daan man ti public market ti Narvacan ngem nalawa ken napintas pay laeng daytoy ken kabaelanna nga akomodaren dagiti adu nga agtagilako ken makitienda. Impanakkelna pay ti kababa ti singir kadagiti puesto iti tiendaanda, ken ti kaadda ti Narvacan Mall a kukua ti Municipal Government nga awan kadagiti dadduma nga ili ken siudad iti Ilocos Sur.

Impakaammona pay ti kaadda ti tumutop a sanitary land fill a pagibellengan iti basura iti Narvacan kas panagtungpalda iti Solid Waste Management Act. Impatalgedna pay ti nainget a panangkontrada kadagiti aramid a mangdadael iti aglawlaw ken nakaparsuaan kas ti illegal logging ken black sand mining.

Nagapila ni former NTA Administraror and Mayor Zaragoza nga ipateg koma dagiti opisial ti gobierno ti R.A. 7171 fund ta napataud daytoy babaen iti adu a rigat ken bannog dagiti mannalon iti tabako ket isuda koma ti kangrunaan a mabenepisiaran.

Naaprobaran a linteg ti R.A. No. 7171 “An Act to promote the development of the farmers in the Virginia tobacco producing provinces” idi Enero 9, 1992 babaen ken ni Presidente Corazon Aquino ken panangesponsor idi ni 1st District Rep. Luis “Chavit” Singson a gagemna a mapadur-as ti biag dagiti mannalon.