Utility worker, nasukalan a nagtakaw iti sim

STA. LUCIA, Ilocos Sur – Nagpullo ti maysa a utility worker ta nasukalan iti akto a panagtakawna kadagiti sim a naipempen iti las-ud ti maysa nga ospital sadiay Barangay Nagrebcan ditoy nga ili idi rabii ti Septiembre 13.

Nagreport iti polis ni Barangay Captain Jun Acosta a tiniliw dagiti tanodna ti maysa a utility worker kalpasan a nasukalan daytoy nga agtaktakaw iti sim a kukua ti ospital a pagpapaayanna.

Segun ken ni Acosta, bayat ti panaggawid ni Roberto Garbin, taga-Brgy. Bao-as, idi agarup 11:45 ti rabii ti Septiembre 13, nalabsanna  ti maysa a traysikel a nagkarga kadagiti sim iti kalsada, partikular iti laud a paset ti Sta. Lucia District Hospital.

Nagsuspetsa ni Garbin ket impakaammona ti nakitana kadagiti barangay tanod ket dagitoy ti nangsiim iti suspek a nagikarga kadagiti sim a naammuanda ti naganna idi agangay a ni Felix Halos y Halaba, 45, naasawaan, utility worker iti nasao nga ospital.

Tiniliw dagiti tanod ni Halos sada impaima kadagiti nagresponde a polis agraman ti traysikel a nagkarga iti 12 a sim.

Naiyendorso iti opisina ti provincial prosecutor iti Candon city ti kaso a qualified theft maikontra ken ni Halos.#