Footer

Van dinungpar ti truck, 1 natay, 6 nasugatan

STA. LUCIA, Ilocos Sur – Maysa ti natay ken 6 ti nasugatan idi dinungpar ti maysa a truck ti maysa a van sadiay Barangay Angkileng ditoy nga ili idi Pebrero 17.

Naireport a natay ni Gladys Yaris, 20, residente iti Barangay Samara, Aringay, La Union idinto a nasugatan da Randy Bitoncol, 40, drayber ti Mercedes Benz van ken agnaed iti Parparia, Narvacan, Ilocos Sur, ken dagiti lima pay a nakalugan iti van.

Iti panagimbestiga dagiti polis, agpaamianan ti Isuzu Forward truck idinto nga agpaabagatan ti van, ket iti pagkurbaan ti kalsada a sakup ti nadakamat a barangay, saan a nakontrol ni Nelson Paa, 38, residente iti Barangay Taleb, Bantay, Ilocos Sur, ti manibela a puon ti panangdarusdosna iti kannigid a paset ti van, sa naidungpar iti maysa a bodega.

Segun iti polis, nagginom da Paa ken dua a helperna iti arak idiay Barangay Libtong, Tagudin, sakbayda nga intuloy ti panagbiaheda. (Danny Antalan)