Van, dinungparna ti dyip

SAN ESTEBAN, Ilocos Sur -Dua a lugan ti nadadael kalpasan a dinungpar ti maysa ti sarsarunuenna a lugan iti Barangay San Nicolas, Candon City.

Dinungpar ti maysa nga Isuzu XLT van, addaan plaka AVZ-278 a minaneho ni Rafael Banggiyaro Jr., 40, ti owner type jeep, addaan plaka SHJ-849, lugan ti barangay ken minaneho ni Daniel Cabang, 32, residente iti barangay Codoog, Narvacan, Ilocos Sur. 

Naammuan iti inbestigasion ti polis nga agturturong dagiti dua a lugan iti abagatan ket idi makadanonda iti masimsimpa a paset ti kalsada ti kalsada nasional a sakup ti San Nicolas, Candon City, nagmenor ti owner type jeep agsipud ta nagsilaw ti stoplight, ngem mapapati a naawanan iti preno ti van ket nadungparna ti immuna a lugan.

Nupay nadadael dagiti lugan, saan ketdi  a naan-ano dagiti drayber. (Danny Antalan)