Footer

Van a nagkarga iti frozen foods, di nakalasat iti quarantine checkpoint

SINAIT, Ilocos Sur – Gapu iti kinaridam dagiti agbambantay iti animal quarantine ditoy nga ili, saan a nakapuslit ti maysa a freezer van a nagkarga kadagiti frozen foods idi sardam ti Disiembre 15.

Intimbre da Provincial Animal Quarantine Officer on Duty Loreinz Legaspi y Garcia ken Mark Basuel y Tabut iti Sinait police station a maysa a freezer van ti dida pinalubosan nga agbiahe nga agpaamianan gapu iti mapapati a panaglabsingna iti ordinansa ti probinsia.

Segun dagiti quarantine officers, saanda a pinalasat nga agbiahe ti Mitsubishi Fuzo freezer van a minaneho ni Andie Jamandron y Makiling, 44, awanan asawa, company driver ti Food Krafters Inc., ken residente iti Victoria St., Abangan Norte, Marilao, Bulacan, agsipud ta saan a nagsardeng ti lugan ti quarantine checkpoint sadiay Barangay Tapao para iti pannakainspeksion.

Awan ti naipakita ni Jamandron a dokumento para iti pannakaibiahe dagiti frozen foods idi sinapul dagiti agbambantay isu a saan a pinalubosan dagiti agbambantay a lumasat iti quarantine area.

Iti panagsukimat dagiti polis, nagkarga ti van kadagiti assorted frozen foods nga addaan iti pakabuklan a dagsen a 4,622 kilos a mapattapatta nga agbalor iti P336,933.83.

Saan a nailanad iti report no kasano a nakapuslit ti freezer van iti quarantine checkpoint sadiay Barangay Bio, Tagudin.

Maipalagip nga idi agarup 3:00 ti bigat  ti Disiembre 14, maysa a Wing van a nagkarga kadagiti baboy ti saan a nagsardeng iti quarantine checkpoint sadiay Tagudin ket nagpakaskas a nagpaamianan.

Kinamat dagiti personnel ti quarantine babaen ti tulong ti Tagudin-police ti van ket nakamatanda ti lugan iti pagbeddengan ti Tagudin ken Sta. Cruz ngem timmakiasen ti di nabigbig a drayber ken pahinante. (Tawid News)