Van, naitapuak iti derraas, 8 nasugatan

SUYO, Ilocos Sur – Maysa a van ti natnag iti derraas bayat ti panagdaliasatna iti kalsada a sakup ti Sitio Kiblungan, Barangay Suyo ditoy nga ili idi agarup alas 4:40 ti malem ti Disiembre 16 ditoy a nakadundunoran dagiti pasahero.

Iti report manipud iti polis ditoy nga ili, walo ti nasugsugatan idi naitapuak iti derraas ti asul a Mitsuhishi Delica van a minaneho ni Samuel Valdez y Salot, 52, naasawaan ken residente iti Poblacion, Alilem, Ilocos Sur.

Immuna a naitaray iti Tagudin General Hospital iti Barangay Bio, Tagudin, Ilocos Sur dagiti naglugan iti van a pakairamanan dagiti agassawa nga Antonio Valdez, Melita Alaon, residente iti Magsaysay District, Tagudin; Luisa Nuval, residente iti Poblacion, Sugpon; Driven Niviren Sixto, residente iti Poblacion Alilem; Salvador Aguioa, residente iti Poblacion, Alilem; Alipio Pitalgo, residente iti Sitio Kilipian, Barangay Uso, Suyo; ken Lina Relio, residente iti Barangay Baringcucurong, Suyo, Ilocos Sur sada naiyalis iti Ilocos Region Training Medical Center, San Fernando City gapu kadagiti sinagrapda a dunor iti nsao nga aksidente.

Iti inisial nga inbestigasion dagiti polis, naammuan nga agsalsalog ti van iti kalsada ket iti kurba a sakup ti nadakamat a sitio, nadlaw ti drayber a saan a kumpet ti preno a gapu iti saanna a pannakakontrol iti manibela a nagtungpal pannakatnag ti lugan ken iti panagtulatidnaĀ  iti bakras ti bantay iti pannakatnagna iti derraas.

Agtultuloy ti panagimbestiga ti polis mainaig iti nasao nga insidente.#