Vice Mayor Lulu met laeng katiket ni Mayor Eva iti May 2013 elections

VIGAN CITY – Ni met laeng incumbent Vice Mayor Lourdes Baquiran ti katiket ni Mayor Eva Marie S. Medina para iti masungad a panagpipili dagiti lokal nga opisial inton Mayo 13, 2013.

Kinuna ni Mayor Medina a ni Vice Mayor Baquiran met laeng ti para bisena agsipud ta “kasla saan a napintas a mangala pay laeng iti sabali ket isu metten ti nakatugaw.”

“No asino ti kaduam, natural nga isu ti suportaramon,” kinuna ti mayora.

Kinuna ni Mayor Medina nga uray dagiti incumbent councilors ket pinaalanan dagiti requirementsda ket isagsaganadan ti sertipiko ti kandidaturada.

Kinuna ti mayora a kumpleton ti line-upda ngem dina pay impalgak no asinoda tapno “saan a ma-counter dagiti planotayo”.

Mainaig kadagiti maisukat kadagiti uppat a konsehal nga agturpos ti terminoda, kinuna ni Medina nga agsobsobrada pay ketdin ket masapul a tanangenna ti panagpilina kadagidiay makatulong kenkuana tapno saan a mataktak wenno madadael dagiti programana.

Saanen nga agkandidato da  Konsehal Loreto Quibilan, Konsehal Audie Agdamag,  Konsehal Hermenigildo Apelin ken Konsehal Henry Formoso agsipud ta maungpotdan ti tallo a nagsasaganad a terminoda.

Iti eleksion idi 2010, dua ti nakalusot a para konsehal a saan a nailinia iti tiket ni Mayor Medina, da dati nga ABC President Constante Benzon ken ni nagbise mayor Franz Ranches.

Naglusulos ni Ranches iti takemna kalpasan a dinutokan ni Pres. Benigno Aquino iti Laguna Lake Development Authority ket ti anakna a ni Franz Ranches III ti nangsukat kenkuana. Manamnama a tumaray ti anakna a para konsehal met laeng iti masungad nga eleksion iti sidong ti Liberal Party.

Uray ni Benzon, manamnama met nga agpailayon.

Sabali pay a teddek ti LP, ni nagkonsehal Molina ti masipsiputan no adda panggepna nga agsubli a konsehal ti siudad.

Naturpos met ni Molina ti tallo a terminona a konsehal sa dinesignaran ni Pres. Aquino a deputy administrator ti National Tobacco Administration, kaduana ni NTA Administrator Edgardo Zaragoza, nag-maymayor iti Narvacan, Ilocos Sur.#