Vice Mayor Singson, mangnamnama a makaduada ni Cong. Singson ita a Paskua

VIGAN CITY, Ilocos Sur – Mangnamnama ti pamilia ti congressman ti umuna a distrito a makadennada daytoy iti isasangbay ti Paskua.

Kinuna ni Vigan Vice Mayor Ryan Singson nga ur-urayenda ti sumaruno a hearing nga intuding ti korte ti Hong Kong  mainaig iti kaso ti kabsatna a ni Cong. Ronald Singson ket mangnamnamada a maiyetnag ti desision tapno makaawid ti diputado inton Paskua.

Naituding a madengngeg ti kaso ni Cong. Singson inton Disiembre 23.

Inaresto dagiti otoridad ti diputado iti Customs Arrival Hall ti Chek Lap Kok International Airport idi Hulio 11 daytoy a tawen gapu iti mapapati a panagikutna iti 26.5 grams a cocaine ken dua a tableta a diazepam wenno valium.

Nupay kasta, pinalubosan ti Tsuen Wan Magistracy’s Courts nga agpiansa ni Singson iti $1.5 milion kalpasan a naipababa iti 6.7 grams ti dagsen ti mapapati a droga a naala iti ikut ni Singson.

Nupay kasta, inaldaw nga agreport ti diputado iti korte kas paset ti temporario a pannakawayawayana.

Naisanud ti kaso iti sumagmamano a daras ket kaudian ti pannakaisanud ti hearing iti Disiembre 23.

Kinuna ni Singson nga uray saan a dinawat ti korte, nagpa-drug test ti kabsatna a diputado ket napaneknekan iti medical records a negatibo iti droga.

“Daytoy ti mangipakita a saan a kas iti panangipagarupda nga agus-usar iti droga ni Cong. Singson,” kinuna ti bise mayor.

Kabayatanna, impakaammo ni Singson nga idi damo a sumagmamano a lawas kalpasan ti pannakaaresto ti kabsatna, isu ti nangituloy kadagiti napanawan daytoy a proyektona ngem idi napiansaanen, ti met laengen diputado ti nangkita kadagitoy babaen ti tawag iti selpon ken iti internet.

“Ipapaskuada koman daydiay desision ti panaggawid ni Cong. Singson no Disiembre 23 tapno makadduami inton Christmas…,” kinuna ti bise mayor.#