Vigan City, 2015 Legislative Awardee, Component City Category

VIGAN CITY – Binigbig ti Philippine Councilors’ League, Ilocos Sur Chapter daytoy a siudad a kasayaatan a lehislatura iti probinsia manipud Hulio 1, 2013 agingga iti Hunio 10, 2015.

Mismo nga inyawat da Vice Governor Deogracias Victor Savellano, PCL- Ilocos Sur Chapter President Nestor Itchon ken DILG Acting Provincial Director Agnes A. De Leon ti plake ti pamma-dayaw iti Sangguniang Panlungsod ng Vigan nga indauluan ni Vice Mayor Lourdes Baquiran bayat ti programa a naangay iti Vigan City Convention Center ditoy siudad idi Marso 9.

Binayabay dagiti konsehal ti siudad a pakaibilangan da Konsehal Juan Carlo Medina, Joy Benette Pajaro Aquino- Orio, Konsehal Francisco Ranches III, Konsehal Ramil Arce, Konsehal Constante Benzon, Konsehal George Villanueva ken Konsehal Benjo Versoza ni Baquiran iti panangawatna iti daytoy kaudian a pammadayaw nga awaten ti Vigan City Council.

Rinimbawan tiVigan City ti Candon City iti pannakapilina a provincial winner iti 2015 Local Legislative Award, Component City Category, para iti nadakamat a tiempo.

Kabayatanna, naigiddan met ditoy ti seremonia a pannakapadayaw dagiti konsehal iti sapasap a probinsia nga agturposen iti tallo a nagsasaganad a termino inton Hunio daytoy a tawen.

Iti Vigan City, karaman da Konsehal Benjo Verzosa ken ni Konsehal George Villanueva kadagiti napadayawan a three-termer councilors.

Saanen nga agkandidato da Verzosa ken ni Villanueva iti aniaman a posision iti masungad nga eleksion.#