Vigan City Convention Center, nabendisionan

VIGAN CITY – Addan kabarbaro a pagtataripnongan ditoy siudad a manamnama a mangawis kadagiti dadakkel a negosiante nga umay ditoy agkumperensia.

Idi malem ti Marso 21, binendisionan ni Most Rev. William Antonio, Auxillary Bishop ti Archdiocese of Nueva Segovia ti Vigan City Convention Center ken babaen ti panangbayabay kenkuana da Vigan City Mayor Eva Marie S. Medina, Congressman Ryan V. Singson, Bokal Jerry Singson, dati a Gov. Carmeling Pichay Crisologo, dagiti city councilors, barangay officials ken dadduma pay a sangaili.

Kinuna ni Mayor Eva Marie S. Medina a saan laeng dagiti otel ken restaurants ti mabenepisiaran iti pannakaipatakder iti nasao a convention center no di pay  dagiti souvenir shops, fishermen, farmers ken transport sectors, kas kadagiti traysikelan ken kalesaan.

Kinunana a  malaksid a mabatir ti ekonomia, agbalin ti convention center a tourist attraction agsipud ta maipalaon iti unegna dagiti mural a gapuanan dagiti Angono artists a mangipakita iti historia ti Vigan manipud idi tiempo dagiti Intsik agingga iti agdama ken dagiti aramid dagiti nangab-abak a lokal a pintor a mangitandudo iti performing arts.#