Vigan City COP, narelibo gapu iti pinnaltog a nakatayan ti barangay captain, polis

BANTAY, Ilocos Sur – Narelibo ti hepe ti polis ti Vigan City gapu iti saan a nasayaat a pannakaipakat ti sistema ti panagpatrolia ti kapolisan iti siudad, segun iti provincial director.

Kinuna ni Provincial Director Police Senior Supt. Eduardo Dopale, Jr., nga addan pammilin a naawatda manipud ken ni Regional Director Police Chief Supt. Franklin Jesus B. Bucayu a pannakarelibo ni Police Supt. Elpidio Nartates agsipud iti mapapati a pannakalabsing iti police integrated patrol system isu a napasamak ti pammaltog iti asideg ti provincial capitol idi Abril 11 a nakapapatayan ti maysa a barangay captain ken maysa a polis.

Inlawlawag ni Dopale a nupay naka-leave of absence ni Nartates idi mapasamak ti pammaltog iti Vigan City, responsibilidadna latta ti panag-duty dagiti polis iti babaenna.

“Uray no naka-leaveka, saanna a kayat a sawen nga awanen ti responsibilidadmo iti duty dagiti tattaom,” kinuna ni Dopale idinto nga innayonna  nga adda naglabsingan iti pannakaipakat ti police integrated patrol system iti siudad isu a napasamak ti pammaltog iti asideg iti kapitolio.

“Idi mapasamak ti shooting incident, awan ti makitatayo a police personnel iti provincial capitol,” kinuna ni Dopale idinto nga innayonna nga standard operation procedure ti kaadda ti polis a mai-detail iti kapitolio kas paset ti police integrated patrol system.

Kinuna ni Dopale a ni Police Chief Inspector Ernesto Navarro, Jr. ti natudingan nga in-charge iti Vigan City police station agingga nga adda mangsukat ken ni Nartates.

(Ni Provincial Public Safety Company Commander, Police Supt. Emmanuel Hombrebueno Reyes ti kabarbaro nga OIC ti Vigan City Police Station. – Ed)

Dead on the spot ni Daclapan, Cabugao Barangay Captain Wilfredo Terrago y Padilla, 45, naasawaan, idinto a pimmusay iti Metro Vigan Cooperative Hospital a nakaitarayanna ni SPO1 Rommel Rebuldela, naasawaan, PNP member a naka-assigned iti Ilocos Sur provincial police office, Bulag, Bantay, Ilocos Sur iti pammaltog a mapapati a napasamak iti nagbaetan ti grupo ti barangay captain ken ti polis.

Nasugatan gapu iti stray bullet ni Annabel Tabaniag y Almachar, 38, balasang, empleada iti city hall ti Vigan City ken residente iti Barangay Bulala Centro, Vigan City.

Segun iti inisial nga inbestigasion dagiti polis, napan kinita ni Rebuldela ti iskediul ti maysa a hearing iti provincial capitol ket idi rimmuar, mapapati nga adda nakitana nga armado  a tattao a puon ti panangsitarna kadakuada a nagtungpal iti panagpaputok ti agsumbangir a nakagudasan ni Terrago ken ni Rebuldela.

Awan pay ti limtuad a saksi a makailawlawag no asino ti nangirugi iti pammaltog iti baet a napasamak daytoy iti aldaw ken kaadu dagiti tattao iti aglawlaw ti provincial capitol iti dayta nga oras.

Kinuna ni Dopale nga administrative relief laeng ti naipakat ken ni Nartates ket posible a maisublinto met laeng a hepe ti polis iti Vigan City kalpasan ti naan-anay nga inbestigasion iti napasamak a shooting incident.

Gapu iti nasao a shooting incident, imbilin ni Dopale ti pannakai-detail ti police personnel iti provincial capitol.#