Vigan City government, gumatang iti takong, bula

VIGAN CITY – Gapu iti panagkirang dagiti maparti a baboy, panggep ti city government ditoy ti gumatang iti takong ken bula.

Kanaig daytoy, imbilin ni Mayor Eva Marie S. Medina ken ni city veterinarian Dr. Liborio Arca ti panagkambasna iti takong ken bula a gatangen ti gobierno ti siudad tapno mapaganakda kas paset ti panangalay-ay iti panagkirang dagiti magatang a baboy para iti lokal a consumption ditoy.

Inyunay-unay ti mayora ken ni Dr. Liborio Arca ti panagsapulda kadagiti 10 a pangganakan a takong tapno dardaras a makaanakda iti burias a maiwaras kadagiti residente ditoy a mayat nga agtaraken iti minimal a presio a maisublinto met laeng iti city government.

Itay nabiit, ingngato dagiti aglaklako ditoy ti presio  ti karne ti baboy manipud iti P140 iti P150.

Kangrunaan a rason dagiti meat vendors iti kakisang ti magatang a liveweight a baboy ket makadanonda payen iti adayo a lugar nga aggatang iti partienda a baboy.

Segun ken ni Arca, naammuanna iti panagkambasna iti gatangen ti city government a takong nga adda lakoda iti Binangonan ken Cavite ngem agpategda iti P35,000 idinto nga iti Batangas, magatangda iti P25,000.

Naammuan a temporario a maikabil dagiti magatang a dingnguen iti piggery farm ni Konsehal Loreto Quibilan sakbay a maiwarasda kadagiti agtaraken.#