Vigan City, Laoag City, ginarigengen ti ginggined

VIGAN CITY – Maysa a pamigsaen a ginggined ti nanglukag kadagiti tattao ditoy siudad idi agarup 4:45 ti agsapa ti Abril 22.

Segun iti Philippine Institute of Volcanology and Seismology (Phivolcs), agpigsa ti ginggined iti 5.9 magnitude ket masarakan ti epicenter iti 70 kilometro iti abagatan a laud daytoy a siudad iti kauneg a 16 kilometro.

Narikna ti ginggined iti pigsa nga Intensity 4 iti Vigan City agraman iti Sinait, Cabugao, San Juan, Magsingal, Santo Domingo, San Ildefonso, Bantay, Cauayan, Sta Catalina ken Santa, iti Ilocos Sur; Paoay, Batac City ken Laoag City iti Ilocos Norte; ken Intensity 3 iti Narvacan, Sta. Maria, Burgos, ken San Esteban.

Kinuna ti Philvocs a tectonic ti nasao a ginggined.

Nupay kasta, awan ti naireport a nadunor wenno nadadael iti napasamak a ginggined a nagpaut iti nasurok maysa a minuto.#