Vigan City, makisalip iti Galing Pook Award

VIGAN CITY – Dua ti pakisalipan daytoy siudad iti Galing Pook Award.

Kinuna ni Mayor Eva Marie S. Medina nga entries ti Vigan City Galing Pook Award ti Escuela de los Mataderos ken ti livelihood program ti city government a nakiraipanna iti dua a kooperatiba tapno matulongan dagiti babassit nga entrepreneur ken agparpartuat  kadagiti traditional industries ditoy a siudad.

Naluktan ti Escuela de los Mataderos a pagadalan dagiti residente ditoy no kasano ti panagparti kadagiti dingnguen kas iti baboy. Daytoy ti kaunaan a pagadalan iti pagilian a mangipaay iti panagsanay no kasano ti agparti iti ayup a mailako iti tiendaan wenno para kadagiti dadakkel nga okasion.

Kinuna ni Medina nga idi pay laeng 1991 a nairusat ti livelihood program ti city government a  mangtulong kadagiti agdamdamili a tagaditoy siudad, nangruna dagiti agnaed iti lumaud a barangay.

Kinunana nga adda tallo a component ti nasao a livelihood program ket immuna a naluktan ti window para kadagiti agdamdamili tapno adda pundoda ken kabukbukodanda a puonan.

Kinuna ni Medina  a naki-tie-up ti city government iti Nueva Consortium of Cooperatives a mangited iti puonan kadagiti agdamdamili nga awanan iti interes ngem  ti city government ti mangbaybayad iti interes ti utang dagitoy.

“Iti maikadua a component, adda inkabil ti city government a pundo iti Nueva Segovia Consortium of Cooperatives ken Pantay Fatima Multipurpose Cooperative, a window a mabalin a pagbulodan dagiti kalugarantayo nga adda bassit negosioda ngem agkurkurang ti pundo,” kinuna ti mayora bayat ti interbio kenkuana kenkuana ni Jun Ramos iti programa daytoy a Barangay Commando-Brigada idinto a dinakamatna dagiti agar-aramid iti longganisa ken agab-abel

Mainaig iti maikatlo a component, napabulodan dagiti miembro iti One Town One Product (OTOP) iti dakkel a kuarta tapno adda maaramatda saan laeng a puonan no di pay para iti pannakailako ti produktoda.

Inyunay-unay ni Medina a naiyussuat ti programa ti livelihood tapno matulongan ken maikkan iti puonan dagiti babassit a negosiante ken agparpartuat nga awan ti gundawayda a makautang kadagiti financial institutions agsipud ta awan ti credit line, collateral, credit card wenno depositoda iti bangko.#