Vigan City mangnamnama a maiyalatna ti award kas best performing city council iti rehion

VIGAN CITY- Mangnamnama ti bise mayor ditoy a masibbolen daytoy a siudad ti pammadayaw kas best performing city council iti rehion iti kategoria ti component city.

Kinuna ni Vice Mayor Franz Ranches a naiyalaten ti Vigan City ti kina-1st runner-up iti napalabas a pasalip ket siinanama a magun-oden daytoy a siudad ti umuna a puesto.

Kasalip ti Vigan ti Urdaneta City ken San Fernando City para iti pammadayaw a Best Performing City Council iti kategoria ti component city.

Ti San Fernando City ti defending champion.

Madama ti evaluation dagiti tallo nga agsasalip a siudad para iti regional level ket batang ti Vigan City a na-evaluate idi Disiembre 16.

Kinuna ni Ranches a sinaganaan ti siudad ti evaluation nangruna iti records kas iti journals, minutes ti sessions, ken dagiti legislative documents kas kadagiti ordinansa ken resolusion ken dagiti impakatda nga inobasion a pakairamanan ti electronic sessions, ken iti aspeto ti public information kas iti kaadda iti radio program a pakaammuan kadagiti aktibidad ti konseho.

Iti documentation ken physical aspects ti patien ni Ranches a nakaarusan ti Vigan City iti napalabas a pasalip ngem inyunay-unayna a bassiten ti puntos ti physical aspect ket dakdakkelen ti puntos dagiti records.

Kinuna ni Ranches a positibo ti reaksion dagiti evaluators kadagiti naiwayat nga innovations, kas iti kaadda ti website, downloadable nga ordinansa ken resolusion iti internet ken iti napartuat a radio documentary no ania ti akem ti konseho, ken dagiti nakalibro a paglintegan.

Multi-sectoral ti nangbukel iti evaluation team a pakairamanan ti Department of Interior and Local Government, Philippine Councilors League, Department of Social Welfare and Development, National Economic Development Administration ken dadduma pay a line agencies.#