Vigan City officials, empleado, nagmula kaykayo iti Arbor Day

VIGAN CITY – Nagmula dagiti agtuturay ken empleado ditoy siudad kadagiti kaykayo kas panangselebrarda iti Arbor Day itay Hunio 21.

Indauluan ni Mayor Eva Marie S. Medina dagiti opisial ti siudad a nagmula kadagiti kaykayo iti Metro Vigan Water District watershed a masarakan iti Barangay Raois ditoy siudad.

Kinuna ni Mayor Medina a naangay ti tree planting iti watershed agsipud ta ditoy ti pagtataudan ti danum para iti Metro Vigan ket kasapulan a maaywanan ken mamulaan kadagiti kaykayo tapno saan a kumiddit ti ubbog ditoy.

Innayon ti mayora a maragsakan a makakita a naglalangto dagiti kaykayo nga immuna nga immulada iti watershed.

Malaksid kadagiti city officials, nakipartisipar a nagmula iti kaykayo dagiti agtutubo,  barangay officials ken agnaed iti Barangay Raois kas paset pay ti programa ti gobierno ti siudad a mangpaberde iti aglawlaw tapno malapdan ti kumarkaro a panagbaliw ti klima.

Ni Konsehala Kisses Marquisse Agdamag ti nangputar iti ordinansa a mangituding iti Arbor Day iti siudad ti Vigan.#