Mayor Eva Marie S. Medina, inawatna pammadayaw bayat ti 40th World Heritage Convention, Kyoto, Japan  idi Nobiembre 8.

KYOTO, Japan – Inruknoy ni Mayor Eva Marie S. Medina ti pannakapadayaw ti siudad ti Vigan kas UNESCO Best Practices in World Heritage Site Management kadagiti amin a Bigueño gapu iti pannakikammayetda iti gobierno ti siudad iti pannakapreserba ken pannakasaluad dagiti duog a pagtaengan ditoy a naipatakder pay laeng idi tiempo dagiti Kastila.

Inawat ni Mayor Medina ti Sertipiko ti Pammigbig kas Best Practice in World Heritage  Management itay Nobiembre 8 bayat ti culmination program ti Maika-40th Anniversary ti World Heritage Convention a naangay sadiay Kyoto, Japan.

Naikkan pay ni Medina iti gundaway a mangibinsabinsa kadagiti nagbalin a padasda iti pannakamanehar para iti pannakasaluad ken pannakatagiben dagiti duog a pagtaengan iti Heritage City of Vigan iti baet ti kinabassit dagiti pondona.

Kinuna ni Mayor Eva Marie S. Medina a dina ninamnama ti pannakapili ti Vigan City a pakaitedan daytoy nga international award agsipud iti kinabassitna a siudad ken iti limitado a resourcesna.

“… Saanmi a ninamnama (a mangabak) ta kabalubalmi dagiti nagdadakkelan ken nagbabaknang a siudad,” kinuna ni Medina.

Kanaig daytoy, nagyaman ni Medina kadagiti nadumaduma a sektor gapu iti pannakikinnamayetda iti gobierno ti siudad para kadagiti gannuat ken programana iti pannakasalaknib ken pannakakonserba dagiti duog a sanikua ti siudad ti Vigan.

Inatiw ti Vigan City dagiti 28 nga entries manipud iti 23 a world heritage cities iti lubong iti daytoy kaunaan nga international award a nagun-odna.

Iti namindua a rikus a konsultasion  ti 10-member selection committee a mangibagi iti Regional Committe Groups, advisory bodies ken ti World Heritage Center ken panangamirisda amin kadagiti submissions, tallo a puntos ti nakitada tapno maited iti historic town of Vigan ti kangatuan a butos iti Best Practices in World Heritage Site Management kadagiti amin a naisubmite: nagun-odna ti good management practice iti baet a limitado dagiti pondona a mabalin a maipakat kadagiti amin a pagilian; naipaset ti lokal a komunidad kadagiti adu nga aspeto ti konserbasion ken panangimaton iti siudad; ken naimuntar dagiti nagkaadu a wagas a pannakasalaknib iti lugar.

Dinayaw pay ti UNESCO ni Medina gapu kadagiti initiatibona iti pannakaimanehar iti siudad ti Vigan nga agserbi kas inspirasion dagiti dadduma pay a world heritage sites.

Itay laeng nabiit, napili ti Vigan City a pakaitedan iti Gawad Pamana ng Lahi iti rehion.

Inawat pay ti siudad itay Nobiembre 9 ti Crown Award ti Nutrition iti Region gapu iti nagsasaganad a tallo a tawen a panangabakna iti Green Banner Award manipud iti National Nutrition Council. Naited daytoy a pammadayaw iti Vigan City gapu iti nasayaat a gapuananna iti pannakaitag-ay ti programa ti nutrision iti siudad.#