Vigan City – Saan nga imposible nga agbalin a distrito daytoy a siudad ken maddaan iti kabukbukodan a congressman kas kadagiti dadduma nga urban cities iti pagilian, segun iti maysa a konsehal ditoy.
Impalgak ni Councilor Benjo Versoza bayat ti pannakiuman-uman dagiti kameng ti Vigan City Press Corps kadakuada nga opisial ditoy a madadaan nga agpresenta a mangputar iti resolusion a mangkiddaw iti panagbalin ti Vigan City a lone district ti Ilocos Sur.
Kinuna ni Verzosa a saan a nalaka ti proseso ta adu dagiti kasapulan, kas met laeng iti panagbalin ti Vigan a kas siudad ngem innayonna a madadaan a mangdepender iti resolusion iti maaramidto a nainget a panangadal ken nabara a deliberasion iti konseho tapno maipasa, kasta metten iti pannakaaprobarna iti kongreso.
Kinuna ti konsehal a bumasbassit ti pundo dagiti siudad maigapu ta umad-adu dagiti munisipalidad a napagbalin a siudad nga agbibingay iti pundo ket dumtengto ti tiempo nga agbalin a sangkapirgis laengen ti maawat a pundo.
Innayonna a nasaysayaat nga agbalin a distrito ti Vigan tapno maibukbok ditoy amin a pundo ti agbalin a congressman ket ad-adu dagiti proyekto ken programa a maiyimplementar para iti pagsayaatan dagiti agindeg. #
