Vigan City rinambakanna Solidarity Week

VIGAN CITY – Kas paset ti panangselebrar ti gobierno ti siudad ditoy iti Solidarity Week, indauluan ni Mayor Eva Marie S. Medina dagiti opisial ken empleado a nangipatalged iti tinawen a karida a mangbantay ken mangsaluad iti nabaknang a tawid daytoy siudad.

Dagiti sumaganad dagiti kangrunaan nga aktibidad bayat ti selebrasion:

-Repaso de Vigan a nakipartisiparan dagiti bumarangay ken ti Department of Education.

-Cultural show a nagtokaran ti Kadangyan Ethnic Band ken nagpartisiparan dagiti nadumaduma a pagadalan.

Adda pay pasalip iti potograpia, Comida de Ayer Food Festival iti  Florentino Street, Historia Oral a pagsalaysayan dagiti nataengan kadagiti napalabasda nga isunto ti pakabuklan iti naratibo a putaren dagiti agsasalip nga estudiante iti elementaria, sekundaria ken kolehio.

Iti Sept. 15, selebrasion ti Family Month, maangay pay ti singing contest a pakipartisiparan dagiti sibubukel a pamilia.#