Vigan City, Taal, napabileg ti relasionda iti panagpinnirmada iti sisterhood agreement

VIGAN CITY –  Immayda, adu ti nakitada ngem imbes a pinarukmada ti simmangbayanda, isuda ti naparukma.

Daytoy ti kababagas ti balikas ni Mayor ti Taal Michael Montenegro idinto a nagyaman iti kinamanagsangaili dagiti agtuturay iti daytoy a siudad ken ti nabara a panangawat kadakuada dagiti agindeg ditoy.

Dinayaw ti mayor ti kinapintas daytoy mabirbirngasan iti Intramuros of the North. 

“Ibilangmi a dakkel a gapuananmi no mapagbalinmi ti Taal uray kagudua laeng ti kinapintas daytoy siudadyo,” paset ti panagbitla ni Montenegro bayat iti programa ti panagpinnirma iti sisterhood agreement iti nagbaetan ti Taal, Batangas ken daytoy a siudad a naangay iti Vigan Culture and Trade Center iti malem ti Mayo 2.

Kinakuyog ni Montenegro dagiti kameng ti konseho ti Taal iti pannakapasingked iti sisterhood agreement iti nagbaetan ti ilina ken daytoy a siudad.

Iti immun-una nga interbiona iti media, kinuna ni Mayor Medina nga adda pagkaaspingan ti Vigan City ken ti Taal, kas iti kaadda iti bukodda a historical district.

Maysa a maibinglay ti Vigan City iti Taal iti pannakapirma ti sisterhood agreement no kasano ti pannakaimanehar ti maysa a historical district.

Kinuna ti mayora nga adda dagiti produkto ti Vigan City a mabalinna nga ilako iti Taal kas iti abel idinto a nalatak met ti Taal kadagiti partuatna a barong.

Kabayatanna, kinuna ni Vice Mayor Franz Ranches a maysa a nagbayagan ti pannakapirma iti sisterhood agreement ti panagbirok ti city government iti oportunidad no kaano nga isayangkat wenno aramiden ti panagpinnirma.

“Inranami ti panagpinnirma iti okasion ti Viva Vigan Festival of the Arts,” kinuna ti bise mayor.

Kinuna ni Medina nga inakseptar metten ti Taguig City ti imbitasion ti Vigan City  nga agbalin a sister city daytoy.

“Adda historical tie-up ti Vigan City iti Taguig ket ad-adda pay a mapapigsa ti relasionda babaen ti sisterhood agreement,” kinuna ti mayora.#