Footer

Vigan Conservation Complex, adda sursuroten a tugot – Mayor Eva

VIGAN CITY – Kayariganna nga adda sursuroten a tugot iti disenio ti mapatpatakder a Vigan City Conservation Complex, daytoy ti naipalgak ni Mayor Eva Marie S. Medina itay nabiit.

Segun ken ni Mayor Medina, nadisenio dagiti building iti nasao a complex a kasla adda tugot a sursuroten a papanan iti tunggal building.

Kinuna ni Medina nga iti umuna nga step, sumrekka iti dua a museo a pakabuyaan kadagiti daan nga alikamen, ramramit ken dadduma pay nga inar-aramat dagiti nagkauna a kaputotan, sumaruno a sumrekan dagiti pagadalan wenno training rooms, sa iti home depot a pakailakuan dagiti daan a material para iti renovation dagiti duog a balbalay, ken iti restaurant ken souvenir shops.

Kinuna ni Medina a malaksid kadagiti tulong manipud kadagiti sumagmamano a senador, ipagpagnada ti pannakaruk-at ti pondo manipud iti Infra Arm ti Department of Tourism a P10 milion.

“Maturpostayo daytoy ta makitatayo metten nga adda panagbanagnan,” impatalged ni Medina.#