Vigan Conservation Complex, nainaguraran

VIGAN CITY – Addanton paggatangan ken pagpaaramidan kadagiti piesa a maisukat kadagiti nadadael a  nga antigo nga alikamen wenno paset ti balay.

Maragpaten daytoy ta nainaguraranen ti Vigan Conservation Complex sadiay San Julian Sur idi malem ti Mayo 7, a naitiempo met iti inaugural ceremony daytoy siudad kas New7Wonders City of the World.

Iti immun-una nga interbiona iti media, kinuna ni Vigan City Mayor Eva Marie Singson-Medina a daytoy ti umuna a kita ti conservation complex a mabangon iti Amianan a paset ti Pilipinas.

Segun ken ni Medina, nadesinio ti conservation complex nga adu ti pakaaramatanna.

Tallo a museo ti naipasdek iti complex a dagiti laeng bricks a produkto ti Vigan ti naaramat a material iti konstruksion.

Kinuna ni Medina a saanto a makauma a pasiaren dagiti estudiante ti conservation complex agsipud ta agbalin dagiti museo nga “interactive in nature”.

Innayon ti mayora a mabalin pay ti bisita a disenioen ti bukodna a balay-Vigan babaen ti panangbaliwna iti kolor wenno iti atep ti balay.

Naipasdek pay iti complex ti maysa a training center ken home depot.

Iti training center ti pakasanayan kadagiti estudiante iti nadumaduma a pagtrabahuan kas iti plumbing,  panagaramid iti muebles ken alikamen, kayo man wenno landok.

Maurnong met iti home depot dagiti gatangen ti city government a daan a material ket ditoy a tarimaanen wenno pasayaaten dagiti nagadal iti training center santo mailako dagitoy kadagiti agkasapulan nga adda duog a pagtaenganda.

Kalpasan a naikur-it ti Vigan iti World Heritage List idi 1999,  nabigbig daytoy historikal a siudad kas maysa a modelo iti best practices in world heritage site management ket inawat ni Mayor Medina ti pammadayaw bayat ti 40th anniversary ti World Heritage Conservation iti Kyoto, Japan idi Nobiembre 8, 2012.

Nabigbig ti Vigan gapu iti naballigi ken sustenable a panangmanehar dagiti agtuturay ditoy  iti konserbasionna iti baet ti limitado a pamataudanna iti kuarta.

Idi Enero 28, 2015, kas pannakabigbig ti pannakapili ti Vigan City a maysa iti New7Wonders Cities of the World ken kas modelo iti heritage conservation, immawat dagiti agtuturay iti siudad iti panangidaulo ni Mayor Medina iti resolusion ti komendasion manipud iti Senado nga idadauluan ni Senate President Franklin Drilon.#