Footer

Vigan Longganisa, plano nga ilata ti NTA

QUEZON CITY – Kalpasan ti naan-anay a panangadal ti National Tobacco Administration  (NTA) iti umno a timpla ti Vigan Longganisa  nga ilakoda, plano daytoy nga ahensia ti pannakaidelatada  tapno umadu ti paglakuanda ken lumawlawa ti marketingna.

Daytoy ti impakaammo ni NTA Administrator Carlitos Encarnacion bayat iti panangpasiar kenkuana ti Tawid News Magasin iti opisinada iti Quezon City itay nabiit.

“Iti agdama, agarup P6,000 iti inaldaw ti paglaklakkuan ti Vigan longganisa iti showroom ditoy national office ket iti masungsungad nga aldaw,  sigurado a dakdakkel pay ti market ti produktotayo,” kinuna ni Encarnacion.

Innayon ti administrator a pakairamanan kadagiti pagibagbagsakanda iti longganisa dagiti  food terminal iti Manila, kooperatiba ken dadduma pay a potensial a lugar a pakailakuan ti nasao a produkto.

Mainaig iti daytoy, manamnama nga iti mabiit,  maisangpet ti canning machine a maaramat para iti pannakailata ti langgonisa tapno ad-adu ti maaramid a produkto ken ad-adu ti pakailakuanna.

“Bareng maisangpet ti canning machine  iti daytoy a tawen tapno iti sumaruno a tawen,  marugian ti pannakailakona iti market,” kinuna ni Encarnacion.

No matungpal daytoy, ti Vigan longganisa ti National Tobacco Administration ti kaunaan a longganisa a mailata.

Ti langgonisa ti maysa kadagiti kangrunaan a produkto ti Vigan City ken magusgustuan dagiti turista a gatangen kas pasalubongda.#