Vigan National High School West, VNHS East, kampeon iti Binatbatan Streetdancing Competition

VIGAN CITY – Saan nga intulok dagiti dua a pagadalan sekundaria ditoy siudad nga iyawid ti sabali a lugar ti kampeonato iti Binatbatan Festival Streetdancing Competition a naangay ditoy idi Mayo 2 kas maysa kadagiti tampok nga aktibidad iti panangselebrarna iti panagpiesta ita a tawen.

Iti Category A, inyalat ti Vigan City National High School West ti umuna a gunggona ket immawat iti tropeo ken P100 cash prize; maikadua ti Capangpangan Elementary School ket immawat iti tropeo ken P70,000.00; ken maikatlo ti San Julian Elementary School ket inyawidna ti tropeo ken P50,000.00.

Iti Category B, imbalat ti Vigan City National High School East dagiti kinasalipna a contingent ket malaksid iti tropeo, immawat iti P100,000.00.

Maikadua a gunggona ti University of Northern Philippines ket inyalatna ti P70,000.00 ken maikatlo a gunggona ti Ilocos Sur National High School ket inyawidna ti P50,000.00 cash prize.

Immawat amin dagiti nakipartisipar iti kumpetision iti sag-P20,000.00.

Ita tawen, pito dagiti contigent a nakisalip iti Category A, idinto a 9 iti Category B.

Kas ninamnama, rinibu dagiti tattao a naglilinia iti kalsada manipud iti sikigan ti City Hall , agpaabagatan agingga iti Simbaan a bassit sa nagpadaya ken nagpakannigid iti Mena Crisologo Street a nakaibalayan dagiti duog a pagtaengan.

Daytoy ti kabursian a pannakarambak ti Binatbatan Festival agsipud iti pannakapili ti Vigan City a nakaangayan iti World Costume Festival no sadino a naiparada dagiti nadumaduma a modelo a nagaruat kadagiti nabursi a costume a naipabuya kadagiti nadumaduma a festival ditoy pagilian ken iti ganggannaet a pagilian.#