Footer

Vigan Tourism and Trade Fair, ad-adu dagiti maidispley ken mailako a produkto: Mayor Eva

TAGUIG CITY – Gapu iti naballigi a tourism ken trade fair idi napan a tawen, nangangay ti gobierno ti siudad ti Vigan City iti sabali manen a trade fair ditoy a siudad a nangrugi itay Nobiembre 20 ken agpatingga iti Nobiembre 24.

Iti pannakipatpatang ni Mayor Eva Marie S. Medina ken ni Peter Rebunal a naipatangatang iti DWRS Barangay Commando Brigada a programa ni Romeo “Jun” Ramos, kinunana nga ad-adu ti mailako a produkto iti Vigan Tourism and Trade Fair agsipud ta naibbusan iti lako dagiti manufacturers nga inawis ti gobierno ti siudad idi napan a tawen.

Segun iti mayora, mailako iti nasao a trade fair dagiti traditional industries a kas iti furniture ken abel ken dagiti food products ti Vigan City a pakairamanan ti empanada, longganisa, bagnet ken maiyam-ammonto pay dagiti partuat dagiti taga-Pantay Fatima a sinelas ken bag ken dagiti produkto manipud iti water lily.

Inesponsoran ti gobierno ti siudad ti panagpasiar dagiti agar-aramid iti sinelas ken bag iti Pantay Fatima iti Taguig ken Marikina tapno agobserba ken agadalda mainaig iti pannakakapintas dagiti aramidenda a produkto.

Kinuna ni Medina a sinaganaanda ti trade fair iti Taguig idinto nga innayonna a malaksid kadagiti text brigade a nagawis kadagiti mapan aggatang, nagpaanunsio pay ti gobierno ti siudad kadagiti sumagmamano a periodiko para iti pannakairakurak dagiti aktibidad iti lima-aldaw a trade fair.

Siraragsak ni Medina a nangipadamag a naammuanna iti maysa a manufacturer a nakalako iti longganisa nga agdagup iti nasurok a P100,000 iti uppat laeng nga aldaw a panaglakoda iti napalabas a trade fair.

“… Siguro, nakalako ti nasao a manufacturer iti sangaribu a dosena a longganisa iti las-ud ti uppat-lima nga aldaw ket dakkel a banag daytan,” kinuna ni Medina idinto nga innayonna nga ad-adu koma pay ti naglakuanda ngem awan metten ti produkto a lakoda.

Impalgak ti mayora  nga immadu dagiti mayat a makipartisipar iti trade fair ngem dagiti met laeng naglako idi napan a tawen ti prioridad nga innala manen ti city government agsipud ta dagitoy ti “nagresponde iti awisda ken namati a di baybay-an ida ti gobierno ti Vigan bayat ti kaaddada iti trade fair ken siguraduenna nga adu ti gumatang iti lakoda”.

“Inawis ti city government amin, ngem isuda laeng ti nagresponde isu nga isuda ti pribiliheo a mapan sadiay (trade fair),” kinuna ni Medina idinto a linagidawna ti maysa a konsehal a mapapati a nangublag kadagiti dadduma a makipartisipar koma iti trade fair idi napan a tawen.

“Kakaasitayo iti executive level nga agpampanunot iti pagsayaatan dagiti manufacturerstayo tapno iti whole year round, adda paglakuanda… ngem imbes koma a tumulongda… isuda pay ti mangrubrubrob iti saan a naimbag,” kinuna ti mayora.

Kinuna ti mayora a libre amin a pagluganan ken pagturogan dagiti manufacturers a nakipartisipar iti trade fair.#