Culture: Natalged a panag-visita iglesia kadagiti simbaan iti Ilocos Sur ita a Semana Santa | Tawid News Magazine - Weekly Ilocos News 📰

Natalged a panag-visita iglesia kadagiti simbaan iti Ilocos Sur ita a Semana Santa

San Vicente church, Ilocos Sur (photo by Jasper A. Espejo)

PASETEN ti tradision ken kultura dagiti Katoliko a Pilipino kas paset ti panangngilin ti Semana Santa ti mapan ag-visita iglesia kadagiti nagduduma a simbaan tapno agkararag ken agpampanunot ti kaipapanan ti panagtutuok ken ipapatay ni Apo Jesucristo iti krus.

Adu iti Ilocos Sur dagiti kadaanan ken nangayed a simbaan a daydaywen dagiti deboto ken pilgrims gapu ta iti Ciudad La Fernandina wenno Vigan ti nagramutan ken sigud a sentro ti Katoliko a Pammati ti Amianan a Luzon manipud idi nayakar ti Sede ti Nueva Segovia idi 1758 manipud Lallo, Cagayan gapu ti ilalawa ti Rio Grande wenno Cagayan River a nangipaay ti pannakalaylayus ken pannakateppang ti nagsaadan ti sentro ti diosesis,

Napili ti Ciudad La Fernandina de Vigan a baro a tugaw ti Sede ti Nueva Segovia gapu ti kinadur-as ti siudad, ket nabangon dagiti adu a simbaan kadagiti parokia idi panawen pay dagiti Kastila. Adu a dara, ling-et, tuok ken rigat dagiti nagkauna nga Ilokano ti naibukbok iti pannakabangon dagitoy a simbaan, ket adu kadakuada dagiti nagtalinaed a natibker kalpasan dagiti naglabas a didigra ken gubat.

Tunggal Semana Santa, mapunpunno dagiti simbaan Katoliko iti Nueva Segovia, ngem napaliiw ti naidumduma a kaadu dagiti deboto ken pilgrims kadagiti simbaan a nagbalinen a pilgrimage destination.

Conversion of St. Paul, Vigan City, Ilocos Sur (photo by Jasper A. Espejo)
Conversion of St. Paul, Vigan City, Ilocos Sur (photo by Jasper A. Espejo)

Maysa kadagiti ar-araken dagiti Katoliko ket ti St. Paul Cathedral iti Vigan City a maibilang kadagiti cultural treasure iti Pilipinas gapu ti kinadaan ken kinangayedna. Nabangon ti katedral iti sentro ti siudad ket inaldaw nga adu dagiti mapan agkararag ken bumisita. Adu pay dagiti mapmapan agkararag ken bumisita iti simbaan a bassit iti abay ti kamposanto a nakaisaadan ti replika ti imahe ni Santo Cristo Milagroso.

Naidumduma met ti kaadu dagiti deboto ken pilgrims a mapmapan tunggal Semana Santa nangruna iti Biernes Santo iti Shrine of Santo Cristo Milagroso wenno St. Nicholas of Tolentino parish church iti Sinait. Nagbalinen ti nangisit ken antigo nga imahe ni Santo Cristo Milagroso wenno Apo Lakay nga atraksion kadagiti deboto gapu ti pannakagun-odda kadagiti kiddawda kadagiti kararagda.

The Saint Augustine Parish Church, Bantay, Ilocos Sur (photo by Eden A. Alviar)
The Saint Augustine Parish Church, Bantay, Ilocos Sur (photo by Eden A. Alviar)

Maysa kadagiti kalatakan a simbaan a daydaywen dagiti adu a deboto, pilgrims ken turista ket ti Shrine of Our Lady of Charity wenno St. Augustine parish church iti Bantay gapu ti kinadaan ken kinangayedna, ken ti kinamanangaasi ni Apo Caridad kadagiti dumawat ti panangibabaetna. Nagbalin metten ti daan a pagkampanaan nga atraksion kadagiti turista.

Maysa pay a mabigbig a pilgrimage destination a daydaywen dagiti agbis-visita iglesia ket ti Saint William The Hermit Parish church iti Magsingal, ken maysa daytoy kadagiti kadaanan a simbaan ken maibilang a cultural treasure ti Pilipinas gapu iti kinangayedna. Sitatakder pay laeng ti orihinal a simbaan ken pagkampanaan ti Magsingal a madama ti pannakapalagdada.

Dr. Daisy Joy Espejo Torina and Monique Torina walk up the steps leading to the Church of Our Lady of the Assumption, Sta. Maria, Ilocos Sur. (photo by Jasper A. Espejo)
Dr. Daisy Joy Espejo Torina and Monique Torina walk up the steps leading to the Church of Our Lady of the Assumption, Sta. Maria, Ilocos Sur. (photo by Jasper A. Espejo)

Pagpampanakkel met ti Ilocos Sur a kadaanan a simbaan iti Our Lady of the Assumption Parish iti ili ti Santa Maria a binigbig ti United Nations Educational and Cultural Organizations a maysa kadagiti sumagmamano a simbaan iti Pilipinas a World Heritage site.

San Vicente church, Ilocos Sur (photo by Jasper A. Espejo)
San Vicente church, Ilocos Sur (photo by Jasper A. Espejo)

Dagiti dadduma pay a kadaanan a simbaan a paborito a pappapanan pagkararagan dagiti deboto ken pilgrims ket ti St. Vincent Ferrer iti ili a San Vicente gapu kadagiti adu a napatgan a kararag dagiti deboto nangruna ti pannakaagas dagiti masaksakit nga ubbing. Nagadu met dagiti deboto ken pilgrims sadiay St. Lucy parish church iti ili a Santa Lucia nangruna dagiti adda sakit iti mata ken panagkitana nga agkidkiddaw ti panangibabaet ti santa iti iyiimbagda.

Saint Augustine Church, Tagudin, Ilocos Sur (photo by Jasper A. Espejo)
Saint Augustine Church, Tagudin, Ilocos Sur (photo by Jasper A. Espejo)

Paborito pay dagiti deboto ken pilgrims dagiti kadaanan a simbaan sadiay St. Augustine parish iti Tagudin ken Immaculate Conception parish iti ili a Santa Cruz gapu ti kinangayedda ken ti pasetda iti panagdur-as ti pammati iti Ilocos Sur.

Ita a Semana Santa ket manayonan pay dagiti adu a mapmapan ag-pilgrimage sadiay St. Anthony of Padua Parish church sadiay Sugpon, Ilocos Sur, gapu ti panangiyetnag ti Vatican a maipaayan dagiti mapan bumisita iti dayta a simbaan iti Plenaria Indulhensia no aramidenda dagiti naipaannong kadakuada nga agkararag, agkompesar, ken mangiwayatda iti “aramid ti kaasi” kas ti pananglimos ken panangsaranay kadagiti napanglaw ken agkasapulan iti tulong. Nayetnag ti Plenaria Indulhenia kadagiti mapan agkararag sadiay simbaan iti Sugpon kabayatan ti pannakarambak ti maika-25 nga anibersario ti parokia.

Agdagup iti 41 dagiti parokia iti Nueva Segovia, ken tallo dagiti addaan iti sagdudua a simbaan a bassit wenno parish chapel, kas ti Simbaan a Bassit iti St. Paul Parish iti Vigan City, Santo Padre Pio chapel iti Panay, Magsingal iti San Lorenzo Ruiz Parish iti Puro, ken Our Lady of Piat chapel iti Guimod Norte, San Juan, a sakup ti St. Isidore The Farmer Parish iti San Isidro, San Juan.

Adu man dagiti nangayed a simbaan iti Ilocos Sur, ngem para kadagiti natibker ti pammatina, saan a ti kinapintas wenno kinalatak ti simbaan a papanan a pagkakaragan ti kapatgan, ngem ti kangrunaan ket ti kinapudno ken kinapasnek nga agkararag iti Dios ken panangsurot kadagiti bilinna.

Tapno agbalin a natalged ken naurnos dagiti maisayangkat a gannuat kadagiti uneg ken arubayan dagiti simbaan ket nakasaganan dagiti nagduduma a parokia kadagiti ipakatda a parking plan ken security measures ita a Semana Santa. Mangipakat dagiti parokia ken Philippine National Police kadagiti security measures kadagiti uneg ken arubayan dagiti simbaan tapno maliklikan ti pannakapasamak dagiti illegal nga aktibidad. Nagpalagipda pay kadagti mapan kadagiti simbaan iti saanda a panagitugot kadagiti dadakkel a kantidad iti kuarta ken panagaruat kadagiti nangina nga alahas, ken panangsaluadda kadagiti gadget ken alikamenda tapno saan a masulisog dagiti dakes ti panunotna.