Travel: Viva 2020 Kannawidan Ylocos Festival! | Tawid News Magazine - Weekly Ilocos News 📰

Viva 2020 Kannawidan Ylocos Festival!

FILE PHOTO: Kannawidan Festival 2018 street dancing competition (photo by Jasper A. Espejo)

Ita a tawen, selebraran dagiti umili iti Ilocos Sur ti maika-13 a Kannawidan Ylocos Festival ken maika – 202 tawen nga anibersario ti pannaka-pundar ti probinsia nga Ilocos Sur.

Pormal a nangrugi dagiti naduma-duma a programa ti piesta idi Enero 28 ken agpatingga inton Pebrero  9.

Agdagup iti 48 nga agkakapintas a pabuya ken pasalip ti mapasamak iti uneg iti 13 nga aldaw a panagpiesta ti Ilocos Sur. Kadduan kadagitoy ti maaramid iti Vigan City  kangrunaanna iti Tamag Grounds.

Malaksid iti panangpadur-as ti turismo iti Ilocos Sur, ti panangtagiben ti kultura ni Ilokano ti kangrunaan a panggep ti pannakairugi ti Kannawidan Ylocos Festival idi 2008 babaen iti liderato ni dati a Gobernador Deogracias Victor “DV” B. Savellano.

Nailunsad ti umuna a Kannawidan Ylocos Festival idi Pebrero 2, 2008 kas pananglagip ti maika-190 nga anibersario ti pannakapirma ti Royal Decree a manggudua ti Probinsia ti Ylocos tapno napundar dagiti Probinsia ti Ilocos Norte ken Ilocos Sur. Idi 2018, agpada a nagselebrar dagiti umili ti Ilocos Norte ken Ilocos Sur ti maika-200 a tawen a pannakapundar ti dua a probinsia.

Iti paset ti programa ti piesta, maiparang kadagiti umili, bisita ken turista dagiti kadaanan ken kabaroanan a kultura ni Ilokano. Maipakita dagiti kaddaanan nga ug-ugali ni Ilokano kabayatan iti piesta tapno saan a malipatan dagitoy ngem ketdi mapadur-as ti pannakaitandudona para kadagiti sumarsaruno a henerasion.

Kabayatan ti Kannawidan Festival, maiparang pay dagiti antigo a produkto ken desinio nga aramid dagiti nagkauna ken agdama nga umili a nalaing iti arte; maipabuya dagiti kadaanan a sala, bado, ramit ken lugan iti probinsia; mapadayawan dagiti umili a nagballigi kadagiti naduma-duma a tay-ak ti paglaingan; ken pannakaisayangkat kadagiti kadaanan ken kabaroanan a pasalip wenno isports.

Kalaksidan ti pannakaiparang kadagiti naisangsangayan a produkto ti agrikultura iti probinsia, maisayangkat pay ti serye ti panagsanay dagiti umili kadagiti kabaroanan  a teknolohia a mangpadur-as ti masapulan iti kada aldaw. Marugian daytoy a panagsanay iti Enero 29 agingga iti Pebrero 2.

Gapu ta mabigbig ti kinarelihioso ni Ilokano, pormal nga indauluan ni Gobernador Ryan Luis V. Singson ti umuna nga aldaw ti Kannawidan Ylocos Festival babaen ti maysa a misa a mapasamak iti Saint Paul Metropolitan Cathedral. Sumaruno ti maysa a prosesion wenno pannakaiparada kadagiti antigo nga imahen ni Jesus Kristo ken amin a santo a patron dagiti Katoliko iti tunggal 32 nga ili ken dua a siudad iti Ilocos Sur.

Iti Enero 29, maaramid iti Tamag Ground ti maysa a ritual nga isayangkat dagiti panglakayen manipud iti naduma-duma a tribu ti Indigenous People (IP) iti probinsia. Maaramid ti panagsala ti “tadek” sakbay a maluktan dagiti paglakuan ken pakaiparangan dagiti naisangsangayan a produkto dagiti umili iti Ilocos Sur.

Iti benneg ti ay-ayam, mailunsad ita a Kannawidan Ylocos Festival ti umuna a “Kannawidan Boxing Cup” a maaramid idiay People’s Coliseum iti Sto. Domingo, Ilocos Sur inton Pebrero 6 – 7.

Dagiti dadduma pay a pabuya kabayatan ti piesta ket dagiti sumaganad: Enero 29 – umuna nga aldaw ti edukasion, fashion show, umuna nga aldaw panagsanay teknolohia ken pagsapulan ken ginebra night; Enero 30 – maika-dua nga aldaw ti edukasion, maikadua nga aldaw panagsanay teknolohia ken pagsapulan ken rabii ti salisal ti banda ken konsierto; Enero 31 – Umuna a torneo ti rodeo ti Sure Ilocos Sur, maikatlo nga  aldaw panagsanay teknolohia ken pagsapulan, Fr. Jose Burgos awards and dinner, ken saniata ti agtutubo; Pebrero 1 – autofest (car and motorcycle show), quiz bee, poem making contest, tinnatoan day,  maikapat nga  aldaw panagsanay teknolohia ken pagsapulan, kannawidan street dancing parade ken showdown; Pebrero 2 – fun run, Titong Singson youth leadership congress, lumba ti kabalio, vintage car parade/display, tinnatoan day 2, maika-5 nga aldaw panagsanay teknolohia ken pagsapulan, charity auction sabong stars, ken Saniata ti Ilocos Sur 2020; Pebrero 3 – Chef wars ken longganisa eating contest, Titong Singson youth leadership congress, Siglat Eskwela, DTI and Art competition awarding ken LGBT night; Pebrero 4 – fun bike, Titong Singson youth leadership congress, traditional games, siglat LGU and siglat Sangguniang awards ken Zarsuela ken Bingo night; Pebrero 5 – Agri-livestock pinaka- contest and awarding night, Titong Singson youth leadership congress, Gawad Titong Singson Awards, Globe night; Pebrero 6 – BHW day ken Kannawidan Boxing Cup; Pebrero 7 – Rhythm  fest day, game fowls day, drag race day ken Kannawidan Boxing Cup; Pebrero 8 – 4X4 challenge day, Rhythm fest day, game fowls day, drag race day ken invitational motorcross day; ken Pebrero 9 – 4X4 challenge day, drag race day, invitational motorcross cup day ken kannawidan cup, karambola ken aldaw ti pallot.

Maawis ngarud ti tunggal Filipino ken turista a mapan makipaset ken agbuya kadagiti nangayed a programa ti 2020 Kannawidan Ylocos Festival.