Viva Vigan Festival of the Arts: dinayo dagiti rinibu a tattao

VIGAN CITY – Saan la a  nabsog dagiti mata dagiti turista iti kaadu ti pabuya nga insagana ti gobierno ti siudad no di pay napapigsa ti pammatida ken ni Apo Lakay iti pannakarambak ti Viva Vigan Festival of the Arts  itay Mayo 1-6 ditoy.

Rinibribu a turista ken sangsangaili ti nagdadarupdop iti daytoy a siudad tapno imatanganda ti Binatbatan streetdancing competition a naangay ditoy iti malem ti Mayo 2.

Saan nga inggingina dagiti tattao ti pudot ti  init iti panagliliniada iti igid ti kalsada manipud iti simbaan ni San Pablo, Quezon Avenue, Florentino Street sa iti Mena Crisologo Street a lumasat iti Vigan Heritage Village tapno imatanganda ti Binatbatan streetdancing competition, tampok a pabuya iti Viva Vigan Festival of the Arts.

Iti pananglukat ti gobierno ti siudad nga indauluan ni Mayor Eva Marie S. Medina ti parambak itay Mayo 1, aldaw ti trabaho, naggigiddan a naluktan dagiti nadumaduma nga exhibits  kas iti garden show ken Trade Fair and Crafts Demo iti Burgos Street, Food Fair iti Florentino Street, National Commission on Culture and Arts exhibit of Filipino Architects iti Vigan Culture and Trade Center, ken Exhibit of Tres de Mayo Images iti Museo San Pablo.

Naisayangkat met iti daytoy nga aldaw ti Carabao Painting contest iti Nueva Segovia Street, Boklan Art Contest iti Crisologo Street, Piglet Catching Contest ken Search for Heritage Singing Idols (Finals) nga agpada a naaramid iti Plaza Burgos.

Iti Mayo 2, malaksid iti Binatbatan Street dancing and showdown, naangay pay ti 2nd Vigan Amazing Heritage Race iti Crisologo Street, Globe Fair-Videoke Challenge and OFW Film  ken ti Globe Free Concert iti Florentino Street.

Iti Mayo 3, naangay ti Abel House Decor Contest, ay-ayam iti sirok dagiti ramada a naipatakder tunggal poblacion barangays, pasalip dagiti naarkosan a  kalesa , Projek Venus a nakaipabuyaan ti ballet babaen ti Cultural Center of the Philippines a naangay iti VCTC, ken ti Disco sa Kalye babaen ti San Miguel Brewery.

Iti daytoy nga aldaw, napusek ti Simbaan a Bassit kadagiti deboto, residente ditoy ken sangsangaili, tapno sumuknal ken agyamanda ken ni Apo Lakay. Adu a deboto ti mamati iti kinamilagroso ni Apo Lakay wenno Black Nazarene nga idi tiempo ti Kastila,  nasarakan ti rebultona a naiyanud iti kabaybayan iti Vigan. 

Segun iti pakasaritaan, idi bagkaten dagiti lumugar ditoy nga iyalis ti rebulto ni Apo Lakay, saanda a nabaelan a bagkaten, isu a nagtalinaed a taengna ti Simbaan a Bassit.
Kasta met nga idi dinalapus ti peste ti Vigan, ni Apo Lakay ti patien dagiti umili ditoy a bimmallaet para iti pannakaisalakan dagiti agindeg.

Iti Mayo 4, naangay ti Bankathon  ken Beach Volleyball tournament iti Mindoro Beach, Viva Vigan Cross Country Mountain Bike Race a limmasat iti Vigan, Bantay, ken Caoayan, Santacruzan, Cultural Show: Kislap ng mga Tala a naangay iti Plaza Burgos.

Iti Mayo 5 ken 6, naangay ti Binibining Silka, Gandang Filipino Beauty Search ken Ilocandia Singing Idol Quarter Finals iti Plaza Burgos.

Maysa a sangaili ti nagkuna nga agsublinto manen inton umay a tawen ta iti pannakipagrambakna iti Viva Vigan Festival of the Arts ditoy, saan laeng a dagiti matana ti nabsog gapu kadagiti adu a nabuyana no di pay pimmigsa ken bimmileg ti ispiritual a pammatina.#