Viva Vigan Festival of the Arts, isagsaganan ti Vigan City government

VIGAN CITY- Nasapsapa ti panagkutikuti dagiti city officials ditoy a mangisagana iti pannakarambak ti Viva Vigan Festival of the Arts.

Nagmimiting dagiti city officials babaen ti panangidaulo ni Mayor Eva Marie S. Medina ket kangrunaan a trinatarda ti panangselebrar ti Vigan City iti nasao a parambak a tinawen a maangay ditoy iti agtapos ti Abril ken umuna a lawas Mayo.

Segun ken ni Medina, maisapsapa ti siam nga aldaw a selebrasion a mangrugi iti Abril 28 agingga iti Mayo 6.

Kinuna pay ni Medina nga irantada a maangay dagiti kangrunaan nga aktibidad iti weekends a kaawan ti serrek dagiti sangaili nangruna dagiti agop-opisina tapno adda gundawayda nga agpasiar ken makipagrambak iti Vigan City.

Maysa kadagiti kangrunaan a daydaywen dagiti turista ditoy siudad ti  Binatbatan Dancing Competition ken showdown a mangitampok iti  abel Iloco, maysa kadagiti maipagpannakkel a produkto daytoy a siudad, ket iti daytoy a tawen, maangay inton Mayo 6, maudi nga aldaw ti parambak.

Kas iti napalabas a tawen, maangay met ti carabao painting ken boklan art competition ngem segun ken ni Medina, mainayon a pagsasalipan ti mosaic art a naaramid iti sarming.

Kinuna ni Medina a nupay maangay ti soft opening ti Vigan City Convention Center inton Marso daytoy a tawen, maigiddan ti grand openingna iti pannakarambak ti Viva Vigan Festival of the Arts ket maipabuyanto ditoy  saan laeng a lokal no di pay national performances.

Innayonna a mailunsadto pay ti souvenir book kas panangselebrar ti Vigan ti maikasangapulo a tawenna manipud panagbalinna a siudad.

Karaman pay dagiti dadduma nga aktibidad iti festival ti garden show, exhibits, antique and furniture show,  trade and food fair a pakaramanan dagiti sangaili iti bagnet, longganisa ken dadduma pay a produkto ti siudad, abel-iloco fashion show, bancathon ken fishing competition, traditional games, dog show, fun run, disco sa kalye ken anti-rabies vaccination.

Kas iti kallabes, inton Mayo 3, maangay  ti Ramada games  kadagiti nadumaduma a barangay.#